Τ’ Ανδρονίκ’

Προβολή Τραγουδιού

Καλλιτέχνες: Γιώργος Στεφανίδης, Κώστας Σιαμίδης

Ορθά να γράφτω ’κ’ επορώ,
τα γράμματα μ’ ολίγα
Σχολείον ντό θενά έτον
νέ είδα, νέ επήγα

Από μωρό σα πρόατα
το ημερ’κό μ’ σα ραχ̌ι͜ά
τ’ οσπίτι μ’ και η κάμαρη μ’
ανάμεσα σα κάσ̌ι͜α

Ορθά να γράφτω ’κ’ εγροικώ
σον λόγον εντροπέας
Έναν ρακόπον δώστε με-ν-
και δύο-τρί’ ελαίας

Θα τραγωδώ για τη σεβντάν
για τη εγάπ’ς τον πόνον
Το γεραλίν το καρδόπο μ’ 
ολίγον να λαρώνω

Γλωσσάρι

Κείμενο	Επεξήγηση	Ετυμ. Ρίζα
γεραλίν	πληγωμένο, τραυματισμένο	yaralı
εγάπ’ς	αγάπης
εγροικώ	καταλαβαίνω
ελαίας	(τα) ελιές, (τη) ελιάς
εντροπέας	ντροπαλός
επορώ	μπορώ
έτον	ήταν
ημερ’κό	μεροκάματο
θενά	θα (κατ’ άλλους ως μία λέξη μαζί με το ντο, ντόθενα και ντόθενας)	θέλει ίνα
’κ’	δεν	οὐκί<οὐχί
καρδόπο	καρδούλα
κάσ̌ι͜α	απότομοι βράχοι, γκρεμοί	kaş
λαρώνω	γιατρεύω, θεραπεύω
νέ	ούτε	ne
ολίγον	λίγο
οσπίτι	σπίτι	hospitium<hospes
πρόατα	πρόβατα
ρακόπον	(υποκορ.) αλκοολούχο ποτό που παράγεται από τη ζύμωση φρούτων ή στεμφύλων φρούτων	rakı/ˁaraḳī + -όπον
ραχ̌ι͜ά	ράχες, βουνά
σεβντάν	αγάπη, έρωτα	sevda/sevdā
τραγωδώ	τραγουδάω
τρί’	τρεις