Ο Καρσλής χορεύ’ το Τας

Προβολή Τραγουδιού

Καλλιτέχνες: Γεώργιος Εμμανουηλίδης, Κωστίκας Κωνσταντινίδης

Ο Κρωμέτες τραγωδεί [ξαν]
και -ν- η λύρα τ’ κελαηδεί
Ο Σαντέτες τρώει τσ̌ορτάν’,
Λιβερίτες πάει σ’ ορμάν’

Μουζενίτες φουρουντσ̌ής
σο χορόν ατ’ πιτσ̌ιμλής
κι ο Καρσλής γιαβάς̌-γιαβάς̌
ση χαράν χορεύ’ το Τας

Ξύλα φέρ’νε ας σο λιβάδ’,
[και] ση χαράν σπάζ’ν’ τ’ αγελάδ’
Παίζ’ η λύρα, το ταούλ’,
σο χορόν εμπαίν’νε ούλ’

Τραγωδούνε μερακλία,
σον γαμπρόν δίν’νε ευχ̌ία
Η νύφε κρατεί το μάχ̌’
κι ο Καρσλής χορεύ’ το Τας

Σουρμενίτες φέρ’ χαψία,
Πλατανέτες τα ρακία
Ορντουλήδες σο τηγάν’
γαβουρεύ’νε γαβουρμάν

Ιμερίτες φέρ’ το γάλαν
και -ν- ο Τογιαλής τη σάλαν
Τρώνε στύπα και λαβάσ̌’
κι ο Καρσλής χορεύ’ το Τας

Γλωσσάρι

Κείμενο	Επεξήγηση	Ετυμ. Ρίζα
αγελάδ’	δαμαλίδα, νεαρή αγελάδα
ας σο	απ’ το	ασό σο (από το)
γαβουρεύ’νε	ξεροψήνουν, καβουρδίζουν, τηγανίζουν	kavurmak
γαβουρμάν	καβουρμά (=κρέας που μαγειρεύεται και ψήνεται στο δικό του λίπος, στη συνέχεια τρώγεται ή καταψύχεται και αποθηκεύεται)	kavurma
γιαβάς̌	αργά	yavaş
δίν’νε	δίνουν
εμπαίν’νε	μπαίνουν
ευχ̌ία	ευχές
κρατεί	κρατάει, βαστάει, στέκει, αντέχει
λαβάσ̌’	πίτα, είδος μαλακού, λεπτού, επίπεδου ψωμιού	lavaş/lavāş
λιβάδ’	λιβάδι
μερακλία	με μεράκι, με ιδιαίτερο ζήλο	meraklı/merāḳ
νύφε	νύφη
ξαν	πάλι, ξανά
ορμάν’	δάσος	orman
ούλ’	όλοι
παίζ’	παίζω/παίζει
πιτσ̌ιμλής	όμορφος, καλοσχηματισμένος, κομψός	biçimli
ρακία	(πληθ.) αλκοολούχο ποτό που παράγεται από τη ζύμωση φρούτων ή στεμφύλων φρούτων	rakı/ˁaraḳī
σάλαν	υποδόριο λίπος χοίρου, (γαστρ.) παστό ή αλατισμένο χοιρινό λίπος	сало
σπάζ’ν’	σφάζουνε
στύπα	ξινά, τουρσιά	στυφός
ταούλ’	νταούλι	davul/ṭabl
Τας	ονομασία αντικρυστού ποντιακού χορού
τραγωδεί	τραγουδάει
τραγωδούνε	τραγουδάνε
τσ̌ορτάν’	είδος σκληρού τυριού από μυζήθρα αποβουτυρωμένη και ξηραμένη στον ήλιο	չոր (ch’vor)=ξερό + Թան (tan)=λιώνω, ρέω
φέρ’	φέρνω/ει
φέρ’νε	φέρνουν
φουρουντσ̌ής	φούρναρης	fırıncı
χαψία	γαύροι	hamsi<ჰამსი
χορεύ’	χορεύω/ει