Ένας αητέντς ’κι δί’ την ψην

Προβολή Τραγουδιού

Καλλιτέχνες: Κωστάκης Πετρίδης, Σταύρος Πετρίδης, Χρήστος Χρυσανθόπουλος

Τ’ αμάραντα μαραίν’ντανε
και τα σιδέρ’τα λύουν
Ένας αητέντς ’κι δί’ την ψ̌ην,
δάκρυ͜α ’κι πρέπ’ να ’κχ̌ύουν
[Έι, έι, έι] Δάκρυ͜α ’κι πρέπ’ να ’κχ̌ύουν

[Και] Τη κεμεντζ̌ές το παίξιμον
τον Άδ’ εχαρεντέρτσεν
Πασ̌τάν τ’ αγγέλτς εκλαίνιξεν,
το Χάρον εφοβέρτσεν
[Έι, έι, έι] Το Χάρον εφοβέρτσεν

[Και -ν-] Εσύ κράτ’, Χάρε, το σπαθίν
κι ο Γώγον το τοξάρι
Και κλώστ’ ερώτα ας λέγω σε
[Ωχ!] «Ποίος έν’ παλληκάρι;»
[Έι, έι, έι] «Ποίος έν’ παλληκάρι;»

Τοξάρ’ πουθέν ’κ’ ευρίεται
σον κόσμον δεν υπάρχει
αέτσ’ γλυκά να κελαηδεί
άμον τη Πατριάρχη
[Ψ̌η μ’, ψ̌η μ’, ψ̌η μ’] Άμον τη Πατριάρχη

[Και] Χάρε, ακόντσον το σπαθί σ’,
όσον ντο θέλτς σ’ ακόνι σ’
Εσύ το Γώγον ’κ’ επορείς
να φέρτς ατον σ’ αλώνι σ’
[Έι, έι, έι] Να φέρτς ατον σ’ αλώνι σ’

Γλωσσάρι

Κείμενο	Επεξήγηση	Ετυμ. Ρίζα
αγγέλτς	αγγέλους
αέτσ’	έτσι
αητέντς	αητός
ακόνι	κάθε σκληρή πέτρα στην οποία τρίβουν την κόψη μαχαιριού ή άλλου μεταλλικού εργαλείου για να γίνει πιο κοφτερή	ἀκόνη
ακόντσον	(προστ.) ακόνισε
αμάραντα	(επιστ. Helichrysum stoechas) τα αγριολούλουδα ελίχρυσος ο πολύτιμος
άμον	σαν, όπως, καθώς	ἅμα
δί’	δίνει
έν’	είναι
επορείς	μπορείς
ερώτα	(προστ.) ρώτησε
ευρίεται	βρίσκεται
εχαρεντέρτσεν	χαροποίησε, ψυχαγώγησε
θέλτς	θέλεις
’κ’	δεν	οὐκί<οὐχί
κεμεντζ̌ές	λύρας	kemençe/kemānçe
’κι	δεν	οὐκί<οὐχί
κλώστ’	(προστ.) γύρνα/γύρισε, επέστρεψε
κράτ’	κράτα, βάστα, κάνε κράτει (προστ.)
’κχ̌ύουν	εκχύνονται, χύνονται, εκρέουν	εκχύνω<ἐγχέω< ἐν + χέω
λύουν	λιώνουν
μαραίν’ντανε	μαραίνονται
πασ̌τάν	ολωσδιόλου, εντελώς	baştan
ποίος	(ερωτημ.) ποιός, (αναφ.αντων.) όποιος
πουθέν	πουθενά
σιδέρ’τα	σίδερα
τοξάρ’	δοξάρι
φέρτς	φέρεις, φέρνεις
ψ̌η	ψυχή
ψ̌ην	ψυχή

Σημειώσεις

Αφήγηση: Μιχάλης Καραβέλας