Η κόρ’ επήεν σον παρχάρ’

Προβολή Τραγουδιού

Καλλιτέχνες: Σταύρος Αβράμογλου, Χρήστος Καλιοντζίδης

Η κόρ’ επήεν σον παρχάρ’
[Έι! πουλί μ’, πουλί μ’]
εγέντονε ρομάνα
[Έλα, έλα λέγω σε]
και για τ’ ατέν θα ’ίνουμαι
[Έι! πουλί μ’, πουλί μ’]
και κυνηγός σ’ ορμάνι͜α
[Έλα, έλα λέγω σε]

Η κόρ’ επήεν σον παρχάρ’,
[Έι! πουλί μ’, πουλί μ’]
επήεν γιά ’κ’ επήεν
[Έλα, έλα λέγω σε]
Φοούμαι ερρούξεν σο νερόν
[Έι! πουλί μ’, πουλί μ’]
κι άμον σ̌εκέρ’ ελύεν
[Έλα, έλα λέγω σε]

Ρομάνες πάτε σο παρχάρ’
[Έι! πουλί μ’, πουλί μ’]
καλά δουλείας ποίστεν¹,
[Έλα, έλα λέγω σε]
Όντες τρώτε τ’ ανθόγαλα
[Έι! πουλί μ’, πουλί μ’]
το μερτικό μ’ αφήστεν
[Έλα, έλα λέγω σε]

Γλωσσάρι

Κείμενο	Επεξήγηση	Ετυμ. Ρίζα
άμον	σαν, όπως, καθώς	ἅμα
ατέν	αυτήν
γιά	είτε, ή	ya/yā
δουλείας	(ονομ. πληθ.) δουλειές, (γεν. ενικ.) δουλειάς
εγέντονε	έγινε
ελύεν	λύθηκε, έλιωσε
επήεν	πήγε
ερρούξεν	έπεσε
’ίνουμαι	γίνομαι
’κ’	δεν	οὐκί<οὐχί
όντες	όταν
ορμάνι͜α	δάση	orman
παρχάρ’	ορεινός τόπος θερινής βοσκής
ποίστεν	(προστ.) κάντε, φτιάξτε	ποιέω-ῶ
ρομάνα	παρχαρομάνα, γυναίκα επιφορτισμένη με την επιμέλεια των ζώων και άλλες γαλακτοκομικές εργασίες στο παρχάρι (θερινό βοσκοτόπι)
ρομάνες	παρχαρομάνες, γυναίκες επιφορτισμένες με την επιμέλεια των ζώων και άλλες γαλακτοκομικές εργασίες στο παρχάρι (θερινό βοσκοτόπι)
σ̌εκέρ’	ζάχαρη, γλυκό/ά	şeker < şakar (περσ.) < śakkharā (οψ. σανσκ.) < śárkarā (σανσκριτ.)
φοούμαι	φοβάμαι

Σημειώσεις

¹ Ακούγεται πιθ. εκ παραδρομής να τραγουδάει «κι άλλα δουλείας ποίστεν»