Τη Τρίχας το γεφύρι

Προβολή Τραγουδιού

Ποντιακό προσκλητήριο | Τραγούδια και χοροί του Πόντου

Καλλιτέχνες: Γιώργος Ιωαννίδης, Μπάμπης Κεμανετζίδης

Ση γέφυραν, ση γέφυραν,
[Έλα, Δάφνε μ’ ποταμέ!]
ση Τρίχας το γεφύριν
[Και! Δάφνε μ’ και μυριγμένε μ’]
Χ̌ίλι͜οι μαστόροι έχτιζαν
[Έλα, Δάφνε μ’ ποταμέ!]
και μύριοι μαθητάδες
[Και! Δάφνε μ’ και μυριγμένε μ’]

Όλεν τη μέραν έχτιζαν,
[Έλα, Δάφνε μ’ ποταμέ!]
το βράδον εχαλάουτον
[Και! Δάφνε μ’ και μυριγμένε μ’]

-Ντό δί’ς με, πρωτομάστορα
[Έλα, Δάφνε μ’ ποταμέ!]
να στένω το γεφύρι σ’;
[Και! Δάφνε μ’ και μυριγμένε μ’]

-Αν δίγω σε τον κύρη μου,
[Έλα, Δάφνε μ’ ποταμέ!]
άλλον κύρην πα ’κ’ έχω
[Και! Δάφνε μ’ και μυριγμένε μ’]

Αν δίγω σε τη μάνα μου,
[Έλα, Δάφνε μ’ ποταμέ!]
άλλο μάναν πα ’κ’ έχω
[Και! Δάφνε μ’ και μυριγμένε μ’]

Αν δίγω σε τα αδέλφι͜α μ’,
[Έλα, Δάφνε μ’ ποταμέ!]
άλλα αδέλφι͜α ’κ’ έχω
[Και! Δάφνε μ’ και μυριγμένε μ’]
 
Αν δίγω σε την κάλη μου,
[Έλα, Δάφνε μ’ ποταμέ!]
καλύτερον ευρήκω!
[Και! Δάφνε μ’ και μυριγμένε μ’]

Γλωσσάρι

Κείμενο	Επεξήγηση	Ετυμ. Ρίζα
βράδον	βράδυ
δίγω	δίνω
δί’ς	δίνεις
ευρήκω	βρίσκω
εχαλάουτον	γκρεμιζόταν, χαλιόταν
’κ’	δεν	οὐκί<οὐχί
κάλη	η αγαπητή σύζυγος, η σύζυγος
μυριγμένε	ευωδιαστέ
όλεν	όλη/ο, ολόκληρη/ο
πα	πάλι, επίσης, ακόμα
στένω	στήνω