Σεράντα μήλα

Προβολή Τραγουδιού

Καλλιτέχνες: Αχιλλέας Βασιλειάδης, Βασίλης Μουρτιάδης

Σεράντα μήλα κόκκινα 
[πουλί μ’/γιάβρι μ’]
σ’ ένα μαντίλ’ δεμένα
Σεράντα σέβντας κι αν ευτάς 
[πουλί μ’/γιάβρι μ’]
’κ’ ευρήκ’ς άμον έμενα

Για έλα, έλα, πουλί μ’,
μετ’ εμέν έλα, γιάβρι μ’
Ατό τ’ ομματοτέρεμα σ’, πουλί μ’
θα σύρ’ και παίρ’ τ’ αχούλι μ’

Σεράντα μήλα κόκκινα 
[πουλί μ’/γιάβρι μ’]
ση σειράν τιζεμένα
Έπαρ’, αρνί μ’, και την στράταν 
[πουλί μ’/γιάβρι μ’]
ντο θα φέρ’ -τ- σε σ’ εμένα

Για έλα, έλα, πουλί μ’,
μετ’ εμέν έλα, γιάβρι μ’
Ατό τ’ ομματοτέρεμα σ’, πουλί μ’
θα σύρ’ και παίρ’ τ’ αχούλι μ’

Σεβντά, γιατί εφώλεψες 
[πουλί μ’/γιάβρι μ’]
αδά ’πέσ’ σο καρδόπο μ’;
Ερίζωσες κι εκλάδωσες 
[πουλί μ’/γιάβρι μ’]
θα σύρτς και παίρτς το ψ̌όπο μ’

Για έλα, έλα, πουλί μ’,
μετ’ εμέν έλα, γιάβρι μ’
Ατό τ’ ομματοτέρεμα σ’, πουλί μ’
θα σύρ’ και παίρ’ τ’ αχούλι μ’

Γλωσσάρι

Κείμενο	Επεξήγηση	Ετυμ. Ρίζα
αδά	εδώ
άμον	σαν, όπως, καθώς	ἅμα
αχούλι	μυαλό	akıl/ʿaḳl
γιάβρι	μωρό, μικρό, παιδί	yavru
έπαρ’	(προστ.) πάρε
ευρήκ’ς	βρίσκεις
ευτάς	κάνεις, φτιάχνεις	εὐθειάζω
εφώλεψες	φώλιασες, μτφ. τρύπωσες, χώθηκες
’κ’	δεν	οὐκί<οὐχί
καρδόπο	καρδούλα
μετ’	μαζί με (με αιτιατική), με (τρόπος)
ομματοτέρεμα	βλέμμα, ματιά
παίρ’	παίρνω/ει
παίρτς	παίρνεις
’πέσ’	(απέσ’) μέσα
σεβντά	αγάπη, έρωτας	sevda/sevdā
σέβντας	(πληθ. τα) αγάπες, έρωτες	sevda/sevdā
σεράντα	σαράντα
σύρ’	σύρω/ει, τραβάω/ει, ρίχνω/ει
σύρτς	σέρνεις, τραβάς, ρίχνεις
τιζεμένα	αραδιασμένα, βαλμένα στη σειρά	dizmek
φέρ’	φέρνω/ει
ψ̌όπο	ψυχούλα