Όσον πόσον

Προβολή Τραγουδιού

Καλλιτέχνες: Δαμιανός Ακριτίδης, Σταύρος Ιωαννίδης, Σταύρος Σαββίδης

Ντ’ έπαθεν απόψ’ ο φέγγον
και ας σα λίβι͜α έξ’ ’κ’ εβγών’;
Γιάμ’ κάτ’ είπες ατον, ψ̌ήκα μ’,
και τη νύχταν ’κι γομών’;

Όσον πόσον θα κρατείς με
ας σο φίλεμα σ’ μακρά;
Θα εβγώνω απάν’ σον φέγγον
και θα παίρω σε σουμά μ’

Άψιμον έν’ και φωτίαν
η εγάπ’ τ’ εσόν, γιαβρί μ’
και φογούμαι η καρδία μ’
γιάμ’ τσακούται άμον γυαλίν

Όσον πόσον θα κρατείς με
ας σο φίλεμα σ’ μακρά;
Θα εβγώνω απάν’ σον φέγγον
και θα παίρω σε σουμά μ’

Ποδεδίζω σε, πουλόπο μ’,
νούντσον κι ολίγον κι εμέν
Σ̌ασ̌ιρεύω και ζαντύνω
και θαρρώ η ψ̌η μ’ θ’ εβγαίν’

Όσον πόσον θα κρατείς με
ας σο φίλεμα σ’ μακρά;
Θα εβγώνω απάν’ σον φέγγον
και θα παίρω σε σουμά μ’

Όσον πόσον θα κρατείς με
ας σο φίλεμα σ’ μακρά;
Θα εβγώνω απάν’ σον φέγγον
και θα παίρω σε σουμά μ’

Γλωσσάρι

Κείμενο	Επεξήγηση	Ετυμ. Ρίζα
άμον	σαν, όπως, καθώς	ἅμα
απάν’	πάνω
άψιμον	φωτιά
γιαβρί	μωρό, μικρό, παιδί	yavru
γιάμ’	μήπως, ή μη	ya/yā + μη
γομών’	γεμίζω/ει
εβγαίν’	βγαίνει
εβγών’	βγαίνει
εβγώνω	βγαίνω
εγάπ’	αγάπη
έν’	είναι
έξ’	έξω ή ο αριθμός έξι
εσόν	δικός/ή/ό σου
ζαντύνω	τρελαίνομαι	σάννας
’κ’	δεν	οὐκί<οὐχί
’κι	δεν	οὐκί<οὐχί
κρατείς	κρατάς
λίβι͜α	σύννεφα	λίβος<λείβω
μακρά	(επιρρ.) μακριά, (επιθ.) μακρινά, απομακρυσμένα
νούντσον	(προστ.) σκέψου
ολίγον	λίγο
όσον πόσον	πόσο πια; μέχρι πότε;
παίρω	παίρνω
ποδεδίζω	(ενεργ. και μέση) χαίρομαι, απολαμβάνω, προσκυνώ	από+δέδιν (<δείδω=φοβάμαι, ανησυχώ)
ποδεδίζω σε	να σε χαρώ	από+δέδιν (<δείδω=φοβάμαι, ανησυχώ)
πουλόπο	πουλάκι
σ̌ασ̌ιρεύω	σαστίζω, τα έχω χαμένα	şaşırmak
σουμά	κοντά
τσακούται	σπάει
φέγγον	φεγγάρι
φίλεμα	φιλί
φογούμαι	φοβάμαι
ψ̌η	ψυχή
ψ̌ήκα	ψυχούλα