Θα τραγωδώ μερακλία

Προβολή Τραγουδιού

Καλλιτέχνες: Γιάννης Αραματανίδης, Γιώργος Αμαραντίδης

Θα τραγωδώ μερακλία,
θα κλαίνε οι νυφάδες
Θα κρύφκουν και τερούνε με
απ’ οπίσ’ ’ς σ’ αραμπάδες

Αΐκα κάλλια έμορφα
άλλο πουδέν ’κι ’ίν’νταν
Ομοιάζ’νε τριαντάφυλλα
Μάρτη κι Απρίλ’ ντο ’ίν’νταν

Απάν’ σ’ αλών’ εκάθουμ’νε
κι αρ’ έπαιζα τα λίντζ̌ι͜α
Έρχουσαν κι εμέν ’φίλ’νανε
νυφάδι͜α και κορίτσ̌ι͜α

Πετούμενον θα ’ίνουμαι,
σον ουρανόν θα εβγαίνω
Στρώσον το κρεβατόπο σου,
θα κατηβαίνω μένω

Απ’ αδά ους τ’ εσέτερα
πορτόπα είναι δέκα
Την ὼρα και τ’ εγκόλπιο μ’
σ’ εσέτερα -ν- εφέκα

Γλωσσάρι

Κείμενο	Επεξήγηση	Ετυμ. Ρίζα
αδά	εδώ
αΐκα	τέτοια/ες
αλών’	αλώνι
απάν’	πάνω
εγκόλπιο	φυλαχτό που κρεμιέται στο λαιμό και φτάνει περίπου στο μέσο του στήθους
εκάθουμ’νε	καθόμουν
έμορφα	όμορφα
έρχουσαν	έρχονταν
εσέτερα	δικά σου/σας
εφέκα	άφησα
’ίν’νταν	γίνονται
’ίνουμαι	γίνομαι
κάλλια	κάλλη
κατηβαίνω	κατεβαίνω
’κι	δεν	οὐκί<οὐχί
κρεβατόπο	κρεβατάκι
κρύφκουν	κρύβονται
λίντζ̌ι͜α	κνήμη ανθρώπου, ωλένη, κόκκαλο, παιδικό παιχνίδι της εποχής
μερακλία	με μεράκι, με ιδιαίτερο ζήλο	meraklı/merāḳ
νυφάδες	νύφες
νυφάδι͜α	νύφες
οπίσ’	πίσω
ους	ως, μέχρι
πορτόπα	πορτούλες	porta
πουδέν	πουθενά
’ς	(ας) από
στρώσον	(προστ.) στρώσε
τερούνε	κοιτούν
τραγωδώ	τραγουδάω
’φίλ’νανε	(εφίλ’νανε) φιλούσαν
ὼρα	ρολόι

https://www.lelevose.gr/to-paixnidi-ston-ponto/