Καλόν λόγον ας έλεες

Προβολή Τραγουδιού

Καλλιτέχνες: Αβραάμ Γκόσιος, Γιάννης Γκόσιος

Καλόν λόγον ας έλεες
κι ας έτονε και ψέμαν
Μαχ̌αίρ’ σην ψ̌η μ’ εκάρφωσες
και κατενίζ’ το αίμαν

Καλόν λόγον γιατί ’κι λες;
πασ̌κείμ’ κακόν θ’ ευτάς -ι;
Το καρδόπο σ’ εγάπεσεν
κι ακόμαν ’κ’ εγροικάς -ι

Για τ’ έναν καλατσ̌ήν τ’ εσόν
ας σα χ̌είλια σ’ κρεμούμαι
Να παίρω λόγον τη σεβντάς
και ξάι να μη κοιμούμαι

Και όλιον πουσ̌τουρίσματα
την ψ̌ης θα κρυφοφάζω
Μελένιον λόγον τη σεβντάς
εσέν για να χορτάζω

Γλωσσάρι

Κείμενο	Επεξήγηση	Ετυμ. Ρίζα
εγάπεσεν	αγάπησε
εγροικάς	καταλαβαίνεις
έλεες	έλεγες
εσόν	δικός/ή/ό σου
έτονε	ήταν
ευτάς	κάνεις, φτιάχνεις	εὐθειάζω
’κ’	δεν	οὐκί<οὐχί
καλατσ̌ήν	ομιλία, συνομιλία, συζήτηση	keleci=καλός λόγος (Παλαιά Τουρκική Ανατολίας)
καρδόπο	καρδούλα
κατενίζ’	καθαρίζω/ει, ξεπλένω/ει, ξεθολώνω/ει	κατανίζω
’κι	δεν	οὐκί<οὐχί
κοιμούμαι	κοιμάμαι
κρεμούμαι	κρεμιέμαι
κρυφοφάζω	κρυφοταΐζω
μαχ̌αίρ’	μαχαίρι
ξάι	καθόλου
όλιον	όλο, ολόκληρο
παίρω	παίρνω
πασ̌κείμ’	μήπως, μήπως (και)	πᾶς καί ἔνι
πουσ̌τουρίσματα	ψιθυρίσματα
σεβντάς	αγάπης, έρωτα	sevda/sevdā
χορτάζω	χορταίνω
ψ̌η	ψυχή
ψ̌ης	ψυχής