Λεγνή μ’, λεγνέσσα μ’

Προβολή Τραγουδιού

Το πόι σ’ λεγνόν και μακρύν
[Λεγνή μ’, πολλά λεγνέσσα]
ίσον άμον ινέαν
[Πώς κοιμάσαι μαναχ̌έσσα;]
Τ’ ομμάτι͜α σ’ καίγ’νε τον Πασ̌ά
[Λεγνή μ’, πολλά λεγνέσσα]
τ’ οφρύδι͜α σ’ βασιλέαν
[Πώς κοιμάσαι μαναχ̌έσσα;]

Λεγνή μ’, λεγνή μ’, λεγνέσσα μ’
δεκαοχτώ χρονέσσα
Τσ̌ούζω σε και πονώ σε
ντο κείσαι μαναχ̌έσσα

Έλα -ν- απάν’ σο σ̌ύριγμα μ’,
[Λεγνή μ’, πολλά λεγνέσσα]
έλα απάν’ σο λαλόπο μ’
[Πώς κοιμάσαι μαναχ̌έσσα;]
Έλα τέρεν τα αίματα
[Λεγνή μ’, πολλά λεγνέσσα]
πώς τρέχ’νε ας σο καρδόπο μ’
[Πώς κοιμάσαι μαναχ̌έσσα;]

Τ’ ομμάτι͜α σ’ ας σον ουρανόν
[Λεγνή μ’, πολλά λεγνέσσα]
(τ’) αστρόπα κατηβάζ’νε
[Πώς κοιμάσαι μαναχ̌έσσα;]
Πόσα καρδόπα -ν- έκαψες
[Λεγνή μ’, πολλά λεγνέσσα]
και πόσα αναστενάζ’νε;
[Πώς κοιμάσαι μαναχ̌έσσα;]

Λεγνή μ’, λεγνή μ’, λεγνέσσα μ’
δεκαοχτώ χρονέσσα
Ο χρόνον δώδεκα μήνας
εσύ, στούδ’ και πετσίν

Γλωσσάρι

Κείμενο	Επεξήγηση	Ετυμ. Ρίζα
άμον	σαν, όπως, καθώς	ἅμα
αναστενάζ’νε	αναστενάζουν
απάν’	πάνω
ας σο	απ’ το	ασό σο (από το)
ας σον	απ’ τον	ασό σον (από τον)
αστρόπα	αστεράκια
καίγ’νε	καίνε
καρδόπα	καρδούλες
καρδόπο	καρδούλα
κατηβάζ’νε	κατεβάζουν
κείσαι	κείτεσαι, ξαπλώνεις
λαλόπο	φωνούλα
λεγνέσσα	λιγνή, λιπόσαρκη
λεγνή	λιγνή, λιπόσαρκη
λεγνόν	λιγνό, λεπτό
μαναχ̌έσσα	μονάχη
μήνας	(τα) μήνες
ομμάτι͜α	μάτια
οφρύδι͜α	φρύδια
πασ̌ά	πασά (βαθμός ή τίτλος τιμητικός ανώτατου πολιτικού ή στρατιωτικού επί Οθωμ. Αυτοκρατορίας), (καθομ.) άρχοντα, τιμητική προσφώνηση μεγαλύτερου αδελφού	paşa
πόι	ύψος, μπόι (ανάστημα)	boy
πολλά	(επίθ.) πολλά, (επίρρ.) πολύ
στούδ’	οστό, κόκκαλο	ὀστοῦν~οστούδιον
σ̌ύριγμα	σφύριγμα	σῦριγξ
τέρεν	(προστ.) κοίταξε
τρέχ’νε	τρέχουν
τσ̌ούζω	λυπάμαι, συμπονώ	σίζω
χρονέσσα	(θηλ) χρονών