Εσύ έ͜εις

Προβολή Τραγουδιού

Εσύ έ͜εις τ’ ήλ’ τα κόκκινα,
τη φέγγονος τ’ ασπρότας
Εσέν που έχ̌’ τη σ̌κύλ’ ο υιόν
πρέπ’ να κλειδών’ τα πόρτας

Σ’ εσέν ’κι πρέπ’ το κάμαση¹,
σ’ εσέν ’κι πρέπ’ το θέρος
Σ’ εσέν ιεύ’ η εγκάλια
σ’ έναν ισίζ’κον μέρος

Ζεβρι͜ά να πας δειλαίνεσαι,
δεξ̌ι͜ά να πας φογάσαι
Δέβα τογρία εμπροστά
σ’ εκείνον π’ αγαπά σε

Αρχόντισσα θα έχω σε,
βασίλισσα θα είσαι
Τσ̌ιτσ̌άκια τριαντάφυλλα
θα στρώνω και θα κείσαι

Γλωσσάρι

Κείμενο	Επεξήγηση	Ετυμ. Ρίζα
ασπρότας	ασπράδες, λευκότητα
δέβα	(προστ.) πήγαινε
δειλαίνεσαι	δειλιάζεις
έ͜εις	έχεις
εγκάλια	αγκαλιά
εμπροστά	μπροστά, πρωτύτερα
έχ̌’	έχει
ζεβρι͜ά	αριστερά
ήλ’	ήλιου
θέρος	καλοκαίρι
ιεύ’	ταιριάζει	uymak
ισίζ’κον	ερημικό, απομονωμένο	ıssız
κάμαση	κάματος, ημερομίσθιο
κείσαι	κείτεσαι, ξαπλώνεις
’κι	δεν	οὐκί<οὐχί
πόρτας	(ονομ.πληθ.) πόρτες	porta
σ̌κύλ’	(γεν.) σκύλου
τογρία	αληθινά, ίσια, ευθεία, σωστά	doğru
τσ̌ιτσ̌άκια	λουλούδια	çiçek
φέγγονος	φεγγαριού
φογάσαι	φοβάσαι

Σημειώσεις

¹ Στην ποντιακή είναι η κάμαση (θηλ) και όχι το κάμαση