Καλαντάρτς και νέον έτος

Καλά ’ποίκα κι εγάπεσα
σουμά ση γειτονίαν
Εμπαίν’ κι εβγαίν’ κι ελέπ’ ατο
και χ̌αίρετ’ η καρδία μ’

Καλαντάρτς και νέον έτος,
κόρ’, θα παίρω σε -ν- οφέτος
Καλαντάρτς, καλή χρονία,
κόρ’, έλα ας φιλώ σε μία

Τη κεμεντζ̌ές ι-μ’ το τοξάρ’
πάει κι έρ’ται κι ερωτά σε
«Ση Καλαντάρ’ και τα νύχτας
μανάχον πώς κοιμάσαι»

Καλαντάρτς και νέον έτος,
κόρ’, θα παίρω σε -ν- οφέτος
Καλαντάρτς, καλή χρονία,
κόρ’, έλα ας φιλώ σε μία

Σο κρεβάτι σ’ ολόερα
πουλόπα κελαηδούνε
’Παλάλωσανε και τ’ αγγέλτς,
ατείν’ πα τραγωδούνε

Καλαντάρτς και νέον έτος,
κόρ’, θα παίρω σε -ν- οφέτος
Καλαντάρτς, καλή χρονία,
κόρ’, έλα ας φιλώ σε μία