Εγώ αγαπώ σε κι έρχουμαι

Εγώ αγαπώ σε κι έρχουμαι
κι εσύ παραμερί͜εις με
Αν αγαπάς με πέ’ μ’ ατο,
άλλο ντό τυραννί͜εις με;

Το ψ̌όπο σ’ έν’ παράδεισος,
τη παραδείσ’ η πόρτα
Γιαβρί μ’, εσέν κανείς ’κι ομοι͜άζ’,
ήντιναν θέλτς ορώτα

Μετ’ εμέν έλα, γιαβρόπο μ’,
μετ’ εμέν έλα, πουλί μ’
Το νόστιμον το τέρεμα σ’
θα σύρ’ και παίρ’ τ’ αχούλι μ’

Το λαλόπο μ’ όντες ακούς,
πουλόπο μ’, πώς κοιμάσαι;
’Κι λες «γεργάνι μ’ άκλερον,
από ’πάν’ ι-μ’ να χάσαι»;

Αρνί μ’, τα μάγ’λα σ’ να φιλώ,
τα χ̌είλι͜α σ’ να βουκούμαι
και σ’ έμορφον τ’ εγκαλόπο σ’
να κείμαι να κοιμούμαι