Θ’ αποθάνω ψεματικά θα τερώ πολλά κλαις με (Καθιστικά/χορευτικά τίκια)

Θ’ αποθάνω ψεματικά,
θα τερώ πολλά κλαις με
Τα μυστικά ντο είπα σε
θα τερώ, όλι͜α λες με;

Γράφτω γράμμαν και στείλω σε
απάν κρούγω την μάρκα μ’
Τ’ εμόν η ψ̌η -ν- ας έβγαινεν
ση κρεβατί’ σ’ την άκραν

Αρνί μ’, τ’ εσόν το τέρεμαν
όσον ντο πάει και παίρ’ με
Αβούτο τ’ εσόν η σεβντά
σ’ εμέν πελι͜άν θα φέρ’ με

♫

Τα μαλλία μ’ έσπρυναν,
ατό πα τέρτ’ ’κ’ ευτάγω
Με τα μαύρα έρθα εγώ
και με τ’ άσπρα θα πάγω

Τα μαλλία μ’ έσπρυναν
ας σα πόνι͜α τα πολλά
Το ψ̌όπο μ’ ’κι θα εβγαίν’,
μανίτσα, απ’ εσέν σουμά