Σεράντα μήλα

Σεράντα μήλα κόκκινα
[πουλί μ’/γιάβρι μ’]
σ’ ένα μαντίλ’ δεμένα
Σεράντα σέβντας κι αν ευτάς
[πουλί μ’/γιάβρι μ’]
’κ’ ευρήκ’ς κι άμον εμέναν

Για έλα, έλα, πουλί μ’,
μετ’ εμέν έλα, γιάβρι μ’
Ατό τ’ ομματοτέρεμα σ’, πουλί μ’
θα σύρ’ και παίρ’ τ’ αχούλι μ’

Σεράντα μήλα κόκκινα
[γιάβρι μ’/πουλί μ’]
ση σειράν τιζεμένα
Έπαρ’, αρνί μ’, και τη στράταν
[πουλί μ’/γιάβρι μ’]
ντο θα φέρ’ -τ- σε σ’ εμέναν

Για έλα, έλα, πουλί μ’,
μετ’ εμέν έλα, γιάβρι μ’
Ατό τ’ ομματοτέρεμα σ’, πουλί μ’
θα σύρ’ και παίρ’ τ’ αχούλι μ’

Σεράντα μήλα κόκκινα
[γιάβρι μ’/πουλί μ’]
δεμένα σα μαντίλι͜α
Κανέναν ’κ’ έτον κόκκινον
[πουλί μ’/γιάβρι μ’]
κι άμον τ’ εσά τα χ̌είλι͜α

Για έλα, έλα, πουλί μ’,
μετ’ εμέν έλα, γιάβρι μ’
Ατό τ’ ομματοτέρεμα σ’, πουλί μ’
θα σύρ’ και παίρ’ τ’ αχούλι μ’