Η Φόνα

Προβολή Τραγουδιού

Καλλιτέχνες: Θεόδωρος Βεροιώτης, Κώστας Καραπαναγιωτίδης

Ε! Φόνα, Φόνα,
ε! καλο-Φόνα
Σην πόρτα σ’ έρθα
’παραβραδι͜άστα
Μενείς και φέρτς με
κι απέσ’ ’κι παίρτς με
Λαλείς και παίρτς με
κι απέσ’ ’κι βάλτς με
Απέσ’ κι αν βάλτς με,
σκαμνίν ’κι δί’ς με

Σκαμνίν κι αν δί’ς με,
«κάθκα» ’κι λες με
«Κάθκα» κι αν λες με,
τραπέζ’ ’κι θέκ’ς με
Τραπέζ’ κι αν θέκ’ς με,
φαΐν ’κι φέρτς με
Φαΐν κι αν βάλτς με,
χουλιάρ’ ’κι φέρτς με
Χουλιάρ’ κι αν φέρτς με,
ψωμίν ’κι δί’ς με

Ψωμίν κι αν δί’ς με,
μαχ̌αίρ’ ’κι φέρτς με
Μαχ̌αίρ’ κι αν φέρτς με,
«κόψον» ’κι λες με
«Κόψον» κι αν λες με,
«φά’ απάν’» ’κι λες με
«Φά’ απάν’» κι αν λες με,
μένον ’κι λες με
Μένον κι αν λες με,
κρεβάτ’ ’κι στρώντς με

Κρεβάτ’ κι αν στρώντς με,
γεργάν’ ’κι δί’ς με
Γεργάν’ κι αν δί’ς με,
μαξιλάρ’ ’κ’ έχω
Μαξιλάρ’ αν δί’ς με,
«πέσκα» ’κι λες με
«Πέσκα» κι αν λες με,
μαναχός είμαι
Έλα, μ’ αφήντς με
ση μαναχ̌ίαν
Φίλεμαν έπαρ’,
φίλεμαν δος με

Γλωσσάρι

Κείμενο	Επεξήγηση	Ετυμ. Ρίζα
απάν’	πάνω
απέσ’	μέσα
αφήντς	αφήνεις
βάλτς	βάζεις, τοποθετείς
γεργάν’	πάπλωμα	yorgan
δί’ς	δίνεις
δος	δώσε
έπαρ’	(προστ.) πάρε
έρθα	ήρθα
θέκ’ς	θέτεις, ακουμπάς
’κ’	δεν	οὐκί<οὐχί
κάθκα	(προστ.) κάθισε
’κι	δεν	οὐκί<οὐχί
κόψον	(προστ.) κόψε
λαλείς	βγάζεις λαλιά, καλείς, αποκαλείς, προσκαλείς, οδηγείς
μαναχ̌ίαν	μοναξιά
μαναχός	μοναχός, μόνος
μαχ̌αίρ’	μαχαίρι
μενείς	ειδοποιείς, στέλνεις μήνυμα, πληροφορείς, παραγγέλνεις	μηνύω
μένον	(προστ.) μείνε
παίρτς	παίρνεις
’παραβραδι͜άστα	(επαραβραδι͜άστα) νυχτώθηκα, με βρήκε το βράδυ
πέσκα	(προστ.) ξάπλωσε
στρώντς	στρώνεις
φά’	(προστ.) φάε
φέρτς	φέρεις, φέρνεις
φίλεμαν	φιλί
Φόνα	γυναικείο υποκοριστικό όνομα, πιθανόν, εκ της Περσεφόνης
χουλιάρ’	κουτάλι	κοχλιάριον