Γεραλίν καρδία

Ο κόσμος με τον κόσμον ζει,
εγώ με τα πελιάδες [γιαρ]
Ν’ αϊλί εμέναν τον καρίπ’
η καρδι͜ά μ’ έχ̌’ γεράδες [νέι]

Πουλόπα, τριγυλίστε με,
δώστε με παρ’γορίαν [νέι]
Άλλο τακάτ’ ’κ’ επέμ’νε με
εκάεν η καρδία μ’ [νέι]

Μάνα, μη τυρα̤ννίεσαι
και για τ’ εμά τα πόνι͜α [γιαρ]
Η μοίρα μ’ έτονε αέτσ’
να υποφέρω χρόνι͜α [νέι]

Εγώ -ν- ας σ’ εγεννέθα κιάν’
μαύρον ζωήν ευτάγω [νέι]
Η ψ̌η μ’ θ’ αναπάεται
σον Άδην όντες πάγω [νέι]