Κορτσόπα, ντό τερείτε με;

Κορτσόπα τρία-τέσσερα,
στο χορόν τιζεμένα
Πασ̌κείμ’ ντό έρθαν για χορόν;
έρθανε για τ’ εμέναν

Κορτσόπα, ντό τερείτε με
και ντό χαμογελάτεν;
Σεβτάν ντο έν’ ’κ’ εξέρετεν,
τσ̌εχέλ’κα, ’κ’ εγροικάτεν

Ατώρα αΐκον μόδα έν’,
κορτσόπα τραγωδούνε
Τ’ αγούρι͜α στέκ’νε στην κιοσ̌άν,
τερούν, χαμογελούνε

Ατώρα αέτσ’ π’ εέντονε
φοβούμαι έναν ημέραν
παιδία, εγώ λέγω σας,
τσί θα χορεύ’ τη Σέραν;