Κερασούντα και Σαμψούντα

Προβολή Τραγουδιού

Καλλιτέχνες: Χορωδία

expand_content

Δύο πουλόπα άκλερα 
μαύρα και φτουλιγμένα
κάθουνταν και μοιρολογούν
λερά και ματωμένα

Λαλούνε και μοιρολογούν
μ’ ανθρώπινη λαλίαν
Κακόν αΐκον ’κ’ είδανε
τ’ ομμάτι͜α μ’ αλλομίαν

Κερασούντα και Σαμψούντα
και το τσ̌όλ’ η Τραπεζούντα
Ποτάμ’ τρέχ’νε τα γαίματα,
ποτάμι͜α και τα δάκρυ͜α
Εγόμωσαν κι εθόλωσαν
όλι͜α τα θαλασσάκρι͜α

Έσπαξαν και κατέσπαξαν
οι Τούρκ’ με τα μαχ̌αίρι͜α
Μωρά επέραν κι έκοψαν
ας ση μάνας τα χ̌έρι͜α

Τα παλληκάρι͜α εκρέμασαν,
έσπαξαν τοι ποπάδες
Σα εκκλησίας έκαψαν
μωρά και γεροντάδες

Κερασούντα και Σαμψούντα
και το τσ̌όλ’ η Τραπεζούντα
Ποτάμ’ τρέχ’νε τα γαίματα
ποτάμι͜α και τα δάκρυ͜α
Εγόμωσαν κι εθόλωσαν
όλι͜α τα θαλασσάκρι͜α

Τ’ ασκέρι͜α τη Τοπάλ Οσμάν
ατά ’κ’ έχ’νε καρδίαν
Ούλια τ’ εκέσ’ εγόμωσαν
κορμία δίχως ψ̌ήα

Θερία άγρι͜α ανήμερα
αρπάζ’νε και τσερίζ’νε
Τ’ ανήμπορους και τα μωρά
άμον χορτάρ’ θερίζ’νε

Κερασούντα και Σαμψούντα
και το τσ̌όλ’ η Τραπεζούντα
Ποτάμ’ τρέχ’νε τα γαίματα 
ποτάμι͜α και τα δάκρυ͜α 
Εγόμωσαν κι εθόλωσαν 
όλι͜α τα θαλασσάκρι͜α

Γλωσσάρι

Κείμενο	Επεξήγηση	Ετυμ. Ρίζα
αΐκον	τέτοιο/α
άκλερα	άκληρα, φτωχά, δυστυχή, ταλαίπωρα
αλλομίαν	άλλη μια φορά
άμον	σαν, όπως, καθώς	ἅμα
αρπάζ’νε	αρπάζουν
ασκέρι͜α	σώματα στρατού	asker/ʿasker
ατά	αυτά
γαίματα	αίματα
εγόμωσαν	γέμισαν
εκέσ’	εκεί
επέραν	πήραν
έσπαξαν	έσφαξαν
έχ’νε	έχουνε
θαλασσάκρι͜α	οι ακροθαλασσιές, τα ακρογιάλια
θερία	θεριά, θηρία
θερίζ’νε	θερίζουν
’κ’	δεν	οὐκί<οὐχί
κάθουνταν	κάθονται
κατέσπαξαν	κατάσφαξαν
κορμία	κορμιά
λαλίαν	λαλιά, φωνή
λερά	ακάθαρτα, βρώμικα	ὀλερός
ομμάτι͜α	μάτια
ούλια	όλα
ποπάδες	παπάδες
ποτάμ’	ποτάμι
πουλόπα	πουλάκια
τοι	τους/τις
Τούρκ’	Τούρκοι
τρέχ’νε	τρέχουν
τσερίζ’νε	σκίζουν, ξεσκίζουν
τσ̌όλ’	έρημο, ερημικό	çöl
φτουλιγμένα	μαδημένα, ξεπουπουλημένα	πτίλον
χορτάρ’	χορτάρι
ψ̌ήα	ψυχές, η περιοχή του στέρνου, τα εσώψυχα

Σημειώσεις

Χορωδία: Βάσω Παντελίδου, Αθηνά Βαφειάδου, Γεωργία Παρουτσίδου
Λύρες: Κωνσταντίνος Κυριακού, Κωνσταντίνος Σωπιάδης, Κωνσταντίνος Χαραλαμπίδης, Νίκος Ξενίδης