Ήλες μαραίν’ τ’ αμάραντα/Ο Γιάννες ο μονογιάννες/Εγώ για τ’ εσέν μόνο ζω/Σ̌ουμπούλα/Χαψία/Τα μαλλία μ’ έσπρυναν

Είνας μάνα εγέννεσεν
τον ήλεν και -ν- εσένα [γιαρ/γιαρ, γιαρ]
Ήλες μαραίν’ τ’ αμάραντα,
κι εσύ μαραίντς εμένα [γιαρ/γιαρ, γιαρ]

Εμάτσα τ’ ομματόπα μου
πουδέν να μη τερούνε [γιαρ/γιαρ, γιαρ]
Όντες ελέπ’νε σε, πουλί μ’,
αμὰν χαμογελούνε [γιαρ/γιαρ, γιαρ]

♫

Ο Γιάννες ο Μονόγιαννες,
ο μαναχόν ο Γιάννες
Ο Γιάννες επεπίρνιξεν
και σο πεγάδ’ επήεν

Εχτύπεσεν τη μαστραπάν,
κι εγνέφιξεν ο δράκον
Εξέβεν δράκος άγγελος
και θέλ’ να τρώει τον Γιάννεν

♫

Εγώ για τ’ εσέν μόνο ζω
και για τ’ εσέν δουλεύω [γιαρ]
Νύχταν κι ημέραν ση ζωή μ’
με το Χάρον παλεύω [γιαρ]

Για τ’ εσέν σύρω βάσανα,
για τ’ εσέν σύρω πόνι͜α, [γιαρ]
για τ’ εσέν τυραννίουμαι,
πουλί μ’, ατόσα χρόνι͜α [γιαρ]

♫

Είναν σ̌ουμπούλαν αγαπώ,
τ’ όνομαν ατ’ς ’κι λέγω!
Την ώρα ντο ’κ’ ελέπ’ ατεν
κάθουμαι κα’ και κλαίγω

Σ̌ουμπούλα μ’, έλα-έλα
Σ̌ουμπούλα μ’, έλα-έλα
Όντες τερώ σε μη τερείς
αφκακέσ’, χαμογέλα

Έλα, πουλί μ’, έλα, αρνί μ’,
έλα μη τυραννί͜εις με
Τ’ εμόν η ψ̌η ολίγον έν’
εβγαίν’ κι άλλο ’κ’ ευρήκ’ς με

Σ̌ουμπούλα μ’, έλα-έλα
Σ̌ουμπούλα μ’, έλα-έλα
Όντες τερώ σε μη τερείς
αφκακέσ’, χαμογέλα

♫

Χαψία έρθαν σο γιαλόν
χοντρά τα ευλοεμένα
Τα παπόρι͜α εχ̌’ κι έρχουν
ζίπα-ζίπα φορτωμένα

Χαψία, χαψία
φατέστεν σ̌κύλ’ παιδία
και ντ’ έμορφα μαειρεύ’ α̤τα
η θεία μ’ η ’Βδοξία

Χαψία βάλεν σο πλακίν
εσέν λέγω, Ηλία!
’Κχ̌ύσον και λίγον λαδόπον
ας ’ίν’νταν μερακλία

Χαψία, χαψία
φατέστεν σ̌κύλ’ παιδία
και ντ’ έμορφα μαειρεύ’ α̤τα
η θεία μ’ η ’Βδοξία

♫

Τα μαλλία μ’ έσπρυναν,
ατό τέρτ’ πα ’κ’ ευτάγω
Με τα μαύρα έρθα εγώ
και με τ’ άσπρα θα πάγω

Που γερά ας αποθάν’
να μη τυραννίεται
Όσον ντο γερά και πάει
το κορμίν ατ’ λύεται