Ευχήν ευτάγω σον Θεόν

Προβολή Τραγουδιού

Καλλιτέχνες: Άκης Κοπαλάς, Αλέξανδρος Κοπαλάς, Διογένης Αϊνατζής

Πουλόπο μ’, μίαν είδα σε
και τάτ’ ’δέκες σα χρόνι͜α μ’
Τ’ ομμάτι͜α σ’ άμον θάλασσας
κι εφούρκ’σανε τα πόνι͜α μ’

Ευχ̌ήν ευτάγω σο Θεόν,
χρόνι͜α πολλά να δί’ σε
Μετ’ εμέν να πορεύκεσαι
και μετ’ εμέν να κείσαι

Κόρη, τη σεβντά σ’ ντο τσ̌ανί͜εις
και την εγάπ’ σ’ ση στράταν;
Δος μ’ έναν τσίρταν τον καρίπ’,
τα χρόνι͜α μ’ να μη χάν’νταν

Ευχ̌ήν ευτάγω σο Θεόν,
χρόνι͜α πολλά να δί’ σε
Μετ’ εμέν να πορεύκεσαι
και μετ’ εμέν να κείσαι

Τ’ εσόν η καρδι͜ά και τ’ εμόν
’κι πρέπ’ να ζούνε χώρι͜α
Έλα σο γιάνι μ’, μη νουνί͜εις
λόγια ντο λέει η χώρα

Ευχ̌ήν ευτάγω σο Θεόν,
χρόνι͜α πολλά να δί’ σε
Μετ’ εμέν να πορεύκεσαι
και μετ’ εμέν να κείσαι

Γλωσσάρι

Κείμενο	Επεξήγηση	Ετυμ. Ρίζα
άμον	σαν, όπως, καθώς	ἅμα
γιάνι	πλάι, πλευρό	yan
’δέκες	(εδέκες) έδωσες
δί’	δίνει
δος	δώσε
εγάπ’	αγάπη
εμόν	δικός/ή/ό μου	ἐμοῦ
εσόν	δικός/ή/ό σου
ευτάγω	κάνω, φτιάχνω	εὐθειάζω
εφούρκ’σανε	έπνιξαν
καρίπ’	μοναχικό, ορφανό, εξαθλιωμένο	garip/ġarīb
κείσαι	κείτεσαι, ξαπλώνεις
’κι	δεν	οὐκί<οὐχί
μετ’	μαζί με (με αιτιατική), με (τρόπος)
μίαν	μια φορά
νουνί͜εις	σκέφτεσαι
ομμάτι͜α	μάτια
πολλά	(επίθ.) πολλά, (επίρρ.) πολύ
πόνι͜α	πόνοι
πουλόπο	πουλάκι
σεβντά	αγάπη, έρωτας	sevda/sevdā
τάτ’	γεύση, νοστιμιά	tat
τσ̌ανί͜εις	καταβρέχεις, διασκορπίζεις, ραίνεις	καταιονίζω/καταιονάω
τσίρταν	σταλιά
χάν’νταν	χάνονται, διώχνονται
χώρα	οι ξένοι γενικά, οι μη οικείοι, η ξενιτειά
χώρι͜α	χωριστά

Προβολή Τραγουδιού

Ευχ̌ήν ευτάγω σον Θεόν