Έικιτι, Άψαλε, χωρίο μ’

Προβολή Τραγουδιού

Έικιτι, Άψαλε, χωρίο μ’,
γομάτ’κο έσ’νε και τρανόν
Ατώρα ’λέπ’ σε η καρδία μ’
ντο ευκαιρώθες και ματών’

Με κεμεντσ̌έδας και τραγωδίας
τα μαχαλάδες ’γομώναν
Κορτσόπα και παλληκαρόπα
πολλά σεβντάδες εποίν’ναν

Τσ̌ιπλάχ’κα ’λάσκουμ’νες παιδία,
τα γόνατα μουν τσ̌αμούρι͜α
Ετράνυναμ’ με τα λαζούδι͜α,
με τα λαβάσ̌ι͜α και τα κουλούρι͜α

Ση Αψάλονος τα σοχάγια
τοσπαγάνας και οφίδι͜α
Εύκαιρα ’σπιτόπα και τσ̌όλι͜α,
πουλία τρώγ’νε τα βοτρύδι͜α

Έρημον, τέκ’ και τσ̌όλ’ χωρίο μ’,
και -ν- εσύ πώς ευκαιρώθες!
Εύντινια και χορταρόπα
απέσ’ σα στράτας ’γομώθες

Γλωσσάρι

Κείμενο	Επεξήγηση	Ετυμ. Ρίζα
απέσ’	μέσα
ατώρα	τώρα
βοτρύδι͜α	τσαμπιά
έικιτι	έκφραση αναπόλησης που υποδηλώνει νοσταλγία για κάτι παρελθοντικό ή εκδήλωση συμπόνοιας για κάποιον	hey gidi
εποίν’ναν	έκαναν, έφτιαχναν	ποιέω-ῶ
έσ’νε	ήσουν
ετράνυναμ’	μεγαλώσαμε
εύκαιρα	άδεια, χωρίς περιεχόμενο/νόημα, ανούσια, μτφ. ανοησίες, (ουσ. τα) τα μαλακά μέρη της κοιλίας, βουβώνας
κορτσόπα	κοριτσάκια
λαβάσ̌ι͜α	πίτες, είδος μαλακού λεπτού, επίπεδου ψωμιού	lavaş/lavāş
’λάσκουμ’νες	(ελάσκουμ’νες) περιφερόμασταν, τριγυρνούσαμε, περιπλανιόμασταν	ἀλάομαι/ηλάσκω
’λέπ’	(ελέπ’) βλέπει/ω
ματών’	ματώνει
μαχαλάδες	γειτονιές	mahalle/maḥalle
μουν	μας
οφίδι͜α	φίδια
παιδία	παιδιά
πολλά	(επίθ.) πολλά, (επίρρ.) πολύ
σεβντάδες	έρωτες	sevda/sevdā
’σπιτόπα	(οσπιτόπα) σπιτάκια
στράτας	(ονομ.) δρόμοι, (αιτ.) δρόμους
τέκ’	μόνο, ένα, μοναδικό	tek
τραγωδίας	τραγούδια
τρώγ’νε	τρώνε
τσ̌αμούρι͜α	λάσπες	çamur
τσ̌όλ’	έρημο, ερημικό	çöl
τσ̌όλι͜α	έρημα, ερημικά	çöl
χορταρόπα	χορταράκια