Εβρούλτσανε τα μέρι͜α μουν

Ο ουρανόν ελίβωσεν,
τα λίβι͜α εταράγαν
Ο ήλ’ κι ο φέγγον σον κόσμον
άλλο ξαν ’κι ’χπαράγαν

Ν’ αϊλί εμέν, νε μάνα μου,
ση πατρίδας τον τόπον
Εβρούλτσανε τα μέρι͜α μουν,
λύεται το καρδόπο μ’

Τουσ̌μάν’ Τουρκάντ’ εκόνεψαν
ση πατρίδας το μέρος
κι ο κομμενόχρονος Κεμάλ
κουρσεύ’ γουτουρεμένος

Ν’ αϊλί εμέν, νε μάνα μου,
ση πατρίδας τον τόπον
Εβρούλτσανε τα μέρι͜α μουν,
λύεται το καρδόπο μ’

Πασ̌άς έχασεν την πατσήν,
μανάδες τα παιδία
Μωρά αραεύ’νε γονικά,
ρούζ’νε σην ορφανίαν

Ν’ αϊλί εμέν, νε μάνα μου,
ση πατρίδας τον τόπον
Εβρούλτσανε τα μέρι͜α μουν,
λύεται το καρδόπο μ’

Καμπάνες κρού’ν λυπητερά
σου Πόντου την καρδίαν
Πατεύ’νε το βασιλοσκάμ’
σην αιματολουσίαν

Ν’ αϊλί εμέν, νε μάνα μου,
ση πατρίδας τον τόπον
Εβρούλτσανε τα μέρι͜α μουν,
λύεται το καρδόπο μ’