Χοροντέας και οκνέας

Την παντρείαν ξάι ’κ’ ενούντσες,
κρίμαν ’κ’ έτονε σ’ εσέν
«Χοροντέαν» είπες «θέλω
και για τη δουλείαν μ’ έν’»

Τα αμπάρι͜α τ’ ’κ’ είν’ γομάτα,
το κελάρ’ν ατ’ έν’ ημ’σόν
Η κοιλία αν ’κι γομούται,
’κι χορεύ’ και Τρομαχτόν

Εσύ ’κ’ έσ’νε μαθεμέντσα,
όλι͜α σ’ με το παραπάν’
Κρέατα και γαβουρμάδας
κι ατώρα μαλέζ’ και τάν’

Τα αμπάρι͜α τ’ ’κ’ είν’ γομάτα,
το κελάρ’ν ατ’ έν’ ημ’σόν
Η κοιλία αν ’κι γομούται,
’κι χορεύ’ και Τρομαχτόν

Τεμιρτσ̌ής και χοροντέας
σο μεϊτάν’ και σο αμόν’
Ους τη Σάββα ση δουλείαν,
την Κερεκήν Τρομαχτόν

Τα αμπάρι͜α τ’ ’κ’ είν’ γομάτα,
το κελάρ’ν ατ’ έν’ ημ’σόν
Η κοιλία αν ’κι γομούται,
’κι χορεύ’ και Τρομαχτόν

Γάμπρε, έλα ση δουλεία μ’,
ντό τ’ εμόν και ντό τ’ εσόν;
Φάζομε σε και κοσσάραν
κι αποπίσ’ το φούστορον

Τα αμπάρι͜α τ’ ’κ’ είν’ γομάτα,
το κελάρ’ν ατ’ έν’ ημ’σόν
Η κοιλία αν ’κι γομούται,
’κι χορεύ’ και Τρομαχτόν