Έμορφος είσαι έμορφος

Προβολή Τραγουδιού

Καλλιτέχνες: Αρχιμήδης Γεωργιάδης, Θόδωρος Παυλίδης

Όλα̤ γιοσμάδας κι έμορφα
[έι! πουλί μ’ και -ν- αρνί μ’]
η μάνα σ’ εζωγράφ’σεν
[έλα, έλα, λέγω σε -ν]
Κι ατό το ζαροτέρεμα σ’
[έι! πουλί μ’ και -ν- αρνί μ’]
την καρδά̤ μ’ ετογράψεν
[φύγον κι έλα μετ’ εμέν]

Έμορφος είσαι -ν-, έμορφος
[έι! πουλί μ’ και -ν- αρνί μ’]
τιδέν ’κ’ έχω να λέγω
[έλα, ε! λελεύω σε!]
Εγώ πα παλληκάρ’ είμαι
[έι! πουλί μ’ και -ν- αρνί μ’]
το καρδόπο σ’ θα καίγω
[φύγον κι έλα μετ’ εμέν]

Σην στράταν σίτα̤ πορπατείς
[έι! πουλί μ’ και -ν- αρνί μ’]
τα τσ̌ιτσ̌έκια -ν- ανθίζ’νε
[έλα, ε! λελεύω σε!]
Όπου κέσ’ γυροκλώσκουμαι
[έι! πουλί μ’ και -ν- αρνί μ’]
εσέν ονοματίζ’νε
[φύγον κι έλα μετ’ εμέν]

Τη μάνα σ’ πέει λόγον μη δί’
[έι! πουλί μ’ και -ν- αρνί μ’]
αρνόπο μ’ ση κανέναν
[έλα, ε! λελεύω σε!]
Σ’ ασκέρ’ ας πάγω κι έρχουμαι
[έι! πουλί μ’ και -ν- αρνί μ’]
κι έλα σουμά σ’ εμένα
[φύγον κι έλα μετ’ εμέν]

Γλωσσάρι

Κείμενο	Επεξήγηση	Ετυμ. Ρίζα
ανθίζ’νε	ανθίζουν
αρνόπο	αρνάκι, χαϊδευτική προσφώνηση γυναίκας
ασκέρ’	σώμα στρατού, συνεκδ. η στρατιωτική θητεία	asker/ʿasker
γυροκλώσκουμαι	κλωθογυρίζω
δί’	δίνει
εζωγράφ’σεν	ζωγράφισε
έμορφα	όμορφα
έμορφος	όμορφος/η
έρχουμαι	έρχομαι
ετογράψεν	κομμάτιασε	doğramak
ζαροτέρεμα	στραβοκοίταγμα
’κ’	δεν	οὐκί<οὐχί
καρδά̤	καρδιά
καρδόπο	καρδούλα
κέσ’	προς τα εκεί, προς το μέρος εκείνο	κέσου<κεῖσ’<κεῖσε<ἐκεῖσε
λελεύω	χαίρομαι
μετ’	μαζί με (με αιτιατική), με (τρόπος)
ονοματίζ’νε	ονοματίζουν, αναφέρουν το όνομα
πα	πάλι, επίσης, ακόμα
πέει	(προστ.) πες
πορπατείς	περπατάς
σίτα̤	καθώς, ενώ	σόταν<εις όταν
σουμά	κοντά
τιδέν	τίποτα
τσ̌ιτσ̌έκια	λουλούδια	çiçek
φύγον	(προστ.) φύγε