Πέει με, πατέρα

Προβολή Τραγουδιού

Πέει με, πατέρα ση ζωήν
ποίον έν’ το σωστόν -ι
Τογρία πώς να πορπατώ
ση στράταν το ορθόν -ι;

Γουρπάν’, τσ̌ιέρι μ’ και κλαδί μ’,
κι απόθεν να σκαλώνω;
Τσ̌ετίν η στράτα τη ζωής
πρέπ’ να κρατείς σον πόνον

Πάπα, σα τέρτι͜α θα κρατώ,
απ’ εσέν θα μαθάνω
Να στέκω ολόρθα ση ζωήν
βάσανα αν περάνω

Ολόχρονα ογράσ̌εψον
καλόν να ευτάς ση χώραν
Ψέμαν μη λες, άμον ντο λέν’
σον κόσμον ούλ’ ατώρα

Να τσ̌ί͜εις πάντα τοι περισ̌άντς,
μη σ’κώντς την αδικίαν
και την παράν μη αγαπάς,
να ευτάς την ανθρωπίαν

Τα λόγια σ’, πάπα, θ’ έχ’ ατα
πίστεμαν και σημάδιν
Κι απάν’ ι-μ’ θα φορώ ατα
άμον αναλλαγάδιν

Γλωσσάρι

Κείμενο	Επεξήγηση	Ετυμ. Ρίζα
άμον	σαν, όπως, καθώς	ἅμα
αναλλαγάδιν	γιορτινή/καλή ενδυμασία
ανθρωπίαν	ανθρωπιά
απάν’	πάνω
απόθεν	από που, από όπου
ατα	αυτά
ατώρα	τώρα
γουρπάν’	θυσία	kurban/ḳurbān
έν’	είναι
ευτάς	κάνεις, φτιάχνεις	εὐθειάζω
μαθάνω	μαθαίνω
ογράσ̌εψον	(αμτβ) (προστ.) πάσχισε, πάλεψε	uğraşmak
ολόρθα	εντελώς όρθια, ευθυτενώς
ούλ’	όλοι
παράν	λεφτά, το χρήμα	para/pāre
πέει	(προστ.) πες
περάνω	περνάω
περισ̌άντς	εξαθλιωμένος, κακομοίρης, δυστυχής	perişan/perīşān
πίστεμαν	το να πιστεύει κάποιος στα λόγια κάποιου, εμπιστοσύνη
πορπατώ	περπατάω
σκαλώνω	αρχινώ, ξεκινώ, εκκινώ ένα έργο/δουλειά
σ’κώντς	σηκώνεις
τέρτι͜α	καημοί, βάσανα, στενοχώριες	dert
τογρία	αληθινά, ίσια, ευθεία, σωστά	doğru
τοι	τους/τις
τσ̌ετίν	σκληρό, δύσκολο	çetin
τσ̌ί͜εις	λυπάσαι, συμπονάς	σίζω
τσ̌ιέρι	σπλάχνο, σωθικό	ciğer/ciger
χώραν	ξένους, μη οικείους, ξενιτειά