Σεβντάς παρακαλίας

Προβολή Τραγουδιού

Ατόσα έχω να λέγω σε
μα ’κ’ επορώ καμίαν
Σ’ ομματόπα σ’ σίτι͜α τερώ
κόπεται η λαλία μ’

Εσέν αν έχω σε, πουλί μ’,
κανείναν ’κι φοούμαι
Νώμα το χ̌έρι σ’ ας κρατώ
κι εντάμαν ας πετούμε
Σα λίβι͜α απέσ’ να χτίζομε
τ’ εγάπης την φωλέαν
Άμον αγγέλ’ μ’ άσπρα φτερά
ση Θεού τη μερέαν

Γνεφίζω κι αραεύω σε,
άμα σο γιάνι μ’ ’κ’ είσαι
Ονέρ’τα άμον πετιμέζ’
χαρί͜εις σ’ ήμποιον νουνί͜ει σε

Εσέν αν έχω σε, πουλί μ’,
κανείναν ’κι φοούμαι
Νώμα το χ̌έρι σ’ ας κρατώ
κι εντάμαν ας πετούμε
Σα λίβι͜α απέσ’ να χτίζομε
τ’ εγάπης την φωλέαν
Άμον αγγέλ’ μ’ άσπρα φτερά
ση Θεού τη μερέαν

Εχάρτσα σε την καρδία μ’,
στόχ̌εψον ντό θα λέγω
Μη τυραννί͜εις με, σ̌κύλ’ κουτάβ’,
άλλο ’κι ταγιανεύω

Γλωσσάρι

Κείμενο	Επεξήγηση	Ετυμ. Ρίζα
αγγέλ’	(ονομ. πληθ.) άγγελοι, (γεν.) αγγέλου
άμον	σαν, όπως, καθώς	ἅμα
απέσ’	μέσα
αραεύω	ψάχνω, αναζητώ, γυρεύω	aramak
γιάνι	πλάι, πλευρό	yan
γνεφίζω	ξυπνώ
εγάπης	αγάπης
εντάμαν	μαζί
επορώ	μπορώ
εχάρτσα	χάρισα
ήμποιον	όποιο, ποιό;
’κ’	δεν	οὐκί<οὐχί
καμίαν	ποτέ
κανείναν	κανένα
’κι	δεν	οὐκί<οὐχί
κόπεται	κόβεται
λαλία	λαλιά, φωνή
λίβι͜α	σύννεφα	λίβος<λείβω
μερέαν	μεριά
νώμα	(προστ.) δώσε μου
ομματόπα	ματάκια
ονέρ’τα	όνειρα
σίτι͜α	καθώς, ενώ	σόταν<εις όταν
σ̌κύλ’	(γεν.) σκύλου
στόχ̌εψον	(προστ.) παρατήρησε, πρόσεξε, επισήμανε
ταγιανεύω	αντέχω, βαστάω, υπομένω	dayanmak
τερώ	κοιτώ
τυραννί͜εις	τυραννάς, ταλαιπωρείς
φοούμαι	φοβάμαι
φωλέαν	φωλιά
χαρί͜εις	χαρίζεις
χτίζομε	χτίζουμε