Ευχήν ας σον πατέρα σουν

Προβολή Τραγουδιού

Καλλιτέχνες: Γεώργιος Ζαπουνίδης, Σάββας Ζαπουνίδης

Τρανόν χαράν έχω σην ψ̌η μ’,
εγάπην σην καρδία μ’
όντες σκαλώνω τραγωδώ
με τα δύο παιδία μ’

Ευχ̌ήν ας σον πατέρα σουν,
τα χ̌ίλι͜α ευλοΐας
Να ζείτε και να χ̌αίρουστουν
πάντα με τραγωδίας

Γιωργούλη, σύρον το τοξάρ’
κι ίεψον τα λαλίας
Εντάμαν, Κώστη, ας τραγωδούμ’
πατρίδας τραγωδίας

Ευχ̌ήν ας σον πατέρα σουν,
τα χ̌ίλι͜α ευλοΐας
Να ζείτε και να χ̌αίρουστουν
πάντα με τραγωδίας

Εσάς τερώ και χ̌αίρουμαι,
παίρω ζωήν και υείαν
Και ανασπάλλω ντ’ έσυρα
εγώ σην κοινωνίαν

Ευχ̌ήν ας σον πατέρα σουν,
τα χ̌ίλι͜α ευλοΐας
Να ζείτε και να χ̌αίρουστουν
πάντα με τραγωδίας

Εσείς να μη ελέπετε
τ’ εμέτερα τα πόνι͜α
Υείαν να δί’ σας ο Θεόν,
παιδία και εγγόνι͜α

Ευχ̌ήν ας σον πατέρα σουν,
τα χ̌ίλι͜α ευλοΐας
Να ζείτε και να χ̌αίρουστουν
πάντα με τραγωδίας

Γουρπάν’ τα κόπι͜α¹ για τ’ εσάς,
τ’ εμά άξια παιδία!
Μάναν και κύρ’ που σέβουστουν
κι όλεν την κοινωνίαν

Ευχ̌ήν ας σον πατέρα σουν,
τα χ̌ίλι͜α ευλοΐας
Να ζείτε και να χ̌αίρουστουν
πάντα με τραγωδίας

Γλωσσάρι

Κείμενο	Επεξήγηση	Ετυμ. Ρίζα
ανασπάλλω	ξεχνώ
ας σον	απ’ τον	ασό σον (από τον)
γουρπάν’	θυσία	kurban/ḳurbān
δί’	δίνει
εγάπην	αγάπη
ελέπετε	βλέπετε
εμά	δικά μου
εμέτερα	δικά μας	ἡμέτερος
εντάμαν	μαζί
έσυρα	έσυρα, τράβηξα, έριξα
ευλοΐας	(πληθ. τα) ευλογίας, ευλογίες
ίεψον	(προστ.) ταίριαξε	uymak
κύρ’	πατέρα
λαλίας	λαλιές, φωνές, (γεν. ενικού) φωνής
όλεν	όλη/ο, ολόκληρη/ο
όντες	όταν
παιδία	παιδιά
παίρω	παίρνω
πόνι͜α	πόνοι
σκαλώνω	αρχινώ, ξεκινώ, εκκινώ ένα έργο/δουλειά
σουν	σας
σύρον	(προστ.) σύρε, τράβα, ρίξε
τερώ	κοιτώ
τοξάρ’	δοξάρι
τραγωδίας	τραγούδια
τραγωδούμ’	τραγουδάμε
τραγωδώ	τραγουδάω
υείαν	υγεία
χ̌αίρουμαι	χαίρομαι
χ̌αίρουστουν	χαίρεστε
ψ̌η	ψυχή

Σημειώσεις

¹ Αδόκιμος τύπος αντί του ορθού στην ποντιακή «κόπους»