Άσπρα φορείς κι άσπρα αναλλά͜εις

Άσπρα φορείς, άσπρα αναλλά͜εις
άσπρον έν’ το καρδόπο σ’
[Έλα, γιαβρί μ’!/γιαρ]
Ας έμ’ τη σπαλερί’ σ’ τ’ αστάρ’
κι εκείμ’νε απέσ’ σο ψ̌όπο σ’
[Έλα, γιαβρί μ’!/γιαρ]

Άσπρα φορείς, άσπρα αναλλά͜εις
άσπρον η φορεσία σ’
[Έλα, γιαβρί μ’!/γιαρ]
Άσπρα τσ̌ιτσ̌έκια ’κχ̌ύγουνταν
ας σην πορπατησία σ’
[Έλα, γιαβρί μ’!/γιαρ]

Όντες φορείς και αναλλά͜εις
τα δρόμι͜α όλα γελούνε
[Έλα, γιαβρί μ’!/γιαρ]
Σο δρόμον πη απαντούνε σε,
κλώσκουν οπίσ’ τερούνε
[Έλα, γιαβρί μ’!/γιαρ]