Σο ίδιο στόλ’

Προβολή Τραγουδιού

Καλλιτέχνες: Θεόδωρος Βεροιώτης, Κώστας Καραπαναγιωτίδης, Μπάμπης Κεμανετζίδης

Σο στόλ’ μαζί ντ’ εκάθουμ’νες [έι, έι, έι]
απόψ’ μαναχός πίνω
[Ντό να ’ίνουμαι;]
Γομώνω το πικρόν ποτήρ’ [έι, έι, έι]
κι απ’ άκρας στιβαρύνω
[Ντό να ’ίνουμαι;]

Ο ουρανόν να κατηβαίν’
’κ’ έχω μάτι͜α για γαρήν
Για τ’ εσέν, πουλί μ’, μανάχον
η καρδία μ’ στιβαρύν’

Σον τόπον ντο εκάθουσ’νε [έι, έι, έι]
τερώ κι απ’ άκραν κλαίγω
[Ντό να ’ίνουμαι;]
Φογούμ’ μεθώ και τραγωδώ [έι, έι, έι]
κι όλια τα τέρτι͜α μ’ λέγω
[Ντό να ’ίνουμαι;]

Ο ουρανόν να κατηβαίν’
’κ’ έχω μάτι͜α για γαρήν
Για τ’ εσέν, πουλί μ’, μανάχον
η καρδία μ’ στιβαρύν’

Φογούμ’ τσακώνω για τ’ εσέν [έι, έι, έι]
ποτήρι͜α και πιάτα
[Ντό να ’ίνουμαι;]
Φογούμ’ θα έν’ πολλά βαρύν [έι, έι, έι]
απόψ’ τ’ εμόν η στράτα
[Ντό να ’ίνουμαι;]

Ο ουρανόν να κατηβαίν’
’κ’ έχω μάτι͜α για γαρήν
Για τ’ εσέν, πουλί μ’, μανάχον
η καρδία μ’ στιβαρύν’

Γλωσσάρι

Κείμενο	Επεξήγηση	Ετυμ. Ρίζα
άκραν	άκρη, αρχή
άκρας	άκρης, άκρες (πληθ. τα)
απ’ άκραν	απ’ την αρχή, με τη σειρά
απ’ άκρας	με τη σειρά
γαρήν	(αιτ.) γυναίκα	karı
γομώνω	γεμίζω
εκάθουμ’νες	καθόμασταν
εκάθουσ’νε	καθόσουν
εμόν	δικός/ή/ό μου	ἐμοῦ
έν’	είναι
’ίνουμαι	γίνομαι
’κ’	δεν	οὐκί<οὐχί
κατηβαίν’	κατεβαίνει
μανάχον	(έναρθρο) μοναχός, μοναχό, (επίρρ) μόνο/μοναχά
μαναχός	μοναχός, μόνος
όλια	όλα
πολλά	(επίθ.) πολλά, (επίρρ.) πολύ
στιβαρύν’	βαριέται, οκνεί
στιβαρύνω	βαριέμαι, οκνώ
στόλ’	τραπέζι	стол
τέρτι͜α	καημοί, βάσανα, στενοχώριες	dert
τερώ	κοιτώ
τραγωδώ	τραγουδάω
τσακώνω	σπάζω, θραύω, τσακίζω
φογούμ’	φοβάμαι