Επέρα χαμαιλέτεν

Επούλτσα τ’ οσπιτόπο μου,
επέρα χαμαιλέτεν [έλα -ν- έλα]
[Και] Πόσα βραδάς εμόνασες
εμέναν τον Κοσμέτεν; [έλα -ν- έλα]

Έλα, πουλί μ’, σο άλεσμαν
σ’ εμέν τον χοβαρτάν-ι [έλα -ν- έλα]
Θ’ αλέθω και θα δίγω σε,
’κι θα παίρω παράν-ι [έλα -ν- έλα]

Θ’ αλέθω και σακίζ’ ατα
κι εσέν καπίκ’ ’κι παίρω [έλα -ν- έλα]
Σ’ έναν καπίκ’ ανάμεσα
έναν φίλεμαν παίρω [έλα -ν- έλα]

Λελεύω τα στομοδόντα σ’,
αρνί μ’, τ’ εσά τα χ̌είλι͜α! [έλα -ν- έλα]
Για έλα σον χαμαιλέταν,
χάσον τα χ̌ερομύλι͜α [έλα -ν- έλα]