Αραεύω σε/Έλα, πουλί μ’/Αγγελούδ’/Μάνα τέρεν

Όλεν τον κόσμον γυρίζω
και παντού ρωτώ
[Πού] θ’ ευρήκω το κορτσόπον
εγώ ντ’ αγαπώ;

Αραεύω σε,
εγώ θέλω σε
Έλα, πουλόπο μ’, σ’ εμέναν,
να λελεύω σε!

Όλια τα καλά σον κόσμον
να χαρίζ’νε με
’κ’ επορούνε απ’ εσένα
να χωρίζ’νε με

Αραεύω σε,
εγώ θέλω σε
Έλα, πουλόπο μ’, σ’ εμέναν,
να λελεύω σε!

♫

Τα λόγια σ’ είν’ άμον μέλ’,
τα φιλέματα σ’ σ̌εκέρ’
Το ποϊόπο σ’ σεβνταλίν,
έφαες τ’ εμόν την ψ̌η μ’

Έλα, έλα, πουλί μ’,
μη τρως τ’ εμόν την ψ̌ην
Είσαι τ’ εμόν τ’ αρνίν [όι]

Το καρδόπο μ’ λύεται,
γιατρικόν ’κ’ ευρίεται
Έλα όσον έν’ νωρίς
να γλυτώντς με επορείς

Έλα, έλα, πουλί μ’,
μη τρως τ’ εμόν την ψ̌ην
Είσαι τ’ εμόν τ’ αρνίν [όι]

♫

Αγαπώ σε, αγγελούδι μ’,
σεβνταλίν πολλά μικρόν
’Κ’ επορώ χωρίς εσέναν
άλλο για να ζω

Αγαπώ σε, αγγελούδι μ’,
εγώ εσέν αγαπώ
Τερώ τη φωτογραφία σ’,
μετ’ εσέν παραμιλώ

Θυμούμαι τ’ εσά τ’ ομμάτι͜α
τ’ έμορφα τα πλουμιστά
Αγγελούδι είσαι, πουλόπο μ’,
θ’ αποθάνω ας ση σεβντάν

Αγαπώ σε, αγγελούδι μ’,
εγώ εσέν αγαπώ
Τερώ τη φωτογραφία σ’,
μετ’ εσέν παραμιλώ

♫

Μάνα, τέρεν πώς χορεύω,
τα παπούτσ̌ι͜α μ’ ’κι γουεύω

Τα παπούτσ̌ι͜α μ’ ’κι γουεύω
γιατί θέλω να παντρεύω

Γιατί θέλω να παντρεύω,
την Ελένην/Τασούλαν αραεύω

Μάνα, τέρεν πώς νουνίζω,
σο κρεβάτι μ’ τριυλίζω

Σο κρεβάτι μ’ τριυλίζω,
την Ελένην/Μαρίτσαν/Σοφούλαν/Τασούλαν ποδεδίζω!