Ποντιακός Στίχος

Προβολή Τραγουδιού

Κατεβάστε τους στίχους σε PDF

Το χαπάρ’

Έναν γενεάν έφυενΈναν γενεάν έφυεν

Στιχουργοί: Διογένης Αϊνατζής

Συνθέτες: Διογένης Αϊνατζής

Καλλιτέχνες: Διογένης Αϊνατζής


Ση στράταν αναχάπαρα
επέντεσα είναν φίλο μ’
κι είπε με το χ̌ιλι͜άκλερον
και άσ̌κεμον χαπάρ’
«Εσουμαδεύτες», είπε με
«και -ν- ενεβζήεν ο ήλι͜ον»
κι άμον κλαδίν ερρούξα κα’
ντο κόφτς με το χουζάρ’

Κλαίγω την τύχην ντ’ εύρε με
και το κακόν ντ’ επάθα
Σίναν να λέγω τα τέρτι͜α μ’;
Ποίος να εγροικά;
Πώς να κρατεί το καρδόπο μ’
’ς σα χαπέρι͜α ντ’ εμάθα
και πώς να γουρταρεύκουμαι -ν-
ας σ’ ατό -ν- τη γεράν;

Νυχτοπατώ και λάσκουμαι
ση μαχαλάς τα στράτας
και σ’ άστρα εξαγουρεύκουμαι
ντο έχω απέσ’ σην ψ̌η μ’
Κι άμα θ’ ευρήκ’ς με σύμπιρνα
οξ̌ουκά ας σην αύλι͜α σ’,
σιφτέν νούντσον ντ’ εχάρτσα σε
την καρδι͜ά μ’ και την ψ̌η μ’

Φύγον, πουλί μ’, μεσανυχτί’,
κανείς να μη ελέπ’ σε
Φόρ’ και το τσ̌ίτ’ μη γουζτουρεύ’ς
σ’ ομμάτι͜α τη κοσμί’
Κι έπαρ’ στράταν απόκρυφον
σ’ οσπίτι μ’ ντο θα φέρ’ -τ- σε
να ’φτάγω σε πεσλέεμαν
άμον μικρόν αρνίν

Έκαψες και -ν- εμάντσες με,
εμάρανες το ψ̌όπο μ’
Κι ατώρα πίντς και χ̌αίρεσαι
αρ’ με τον νισ̌αλού σ’
Ὰμα ας εξέρτς κάθαν βραδήν
σο κρεβάτι σ’, πουλόπο μ’,
όσον ’γρασ̌εύ’ς ’κι θα επορείς
να βγάλτς με -ν- ας σο νου σ’
Γλωσσάρι
ΚείμενοΕπεξήγησηΕτυμ. ΡίζαΠροέλευση
ὰμααλλά ama/ammā
άμονσαν, όπως, καθώς ἅμα
αναχάπαρααπροειδοποίητα, ξαφνικά στερ. αν- + haber/ḫaber
απέσ’μέσα
ας σ’(ας σου) από του, από τότε που/αφότου, (ας σο) από το/τα
άσ̌κεμονάσχημο, κακότροπο
ατώρατώρα
αύλι͜ααυλή
βραδήνβράδυ
γεράνπληγή, τραύμα yara
γουζτουρεύ’ςπειράζεις, εξαγριώνεις, ενοχλείς, ερεθίζεις kızdırmak
γουρταρεύκουμαιγλυτώνω, διασώζομαι kurtarmak
εγροικάκαταλαβαίνει
είνανέναν, μία
ελέπ’βλέπει/βλέπω
εμάντσεςμαύρισες/μουντζούρωσες από την καπνιά, κατέστρεψες, κατέκαψες μέχρι καπνιάς
εμάρανεςμάρανες
ενεβζήενέσβησε
εξαγουρεύκουμαιεξομολογούμαι
εξέρτςξέρεις, γνωρίζεις
έπαρ’(προστ.) πάρε
επέντεσααπάντησα, συνάντησα τυχαία
επορείςμπορείς
ερρούξαέπεσα
εσουμαδεύτεςαρραβωνιάστηκες
εύρεβρήκε
ευρήκ’ςβρίσκεις
εχάρτσαχάρισα
κα’κάτω
κάθανκάθε
καρδόποκαρδούλα
’κιδεν οὐκί<οὐχί
κοσμί’κόσμου
κόφτςκόβεις
κρατείκρατάει, βαστάει, στέκει, αντέχει
λάσκουμαιπεριφέρομαι, τριγυρίζω, περιπλανώμαι ἀλάομαι/ηλάσκω
μαχαλάςγειτονιάς mahalle/maḥalle
μεσανυχτί’την ώρα του μεσονυχτίου
νισ̌αλούαρραβωνιαστικιά, σημαδεμένη nişanlı<nişān
νούντσον(προστ.) σκέψου
ομμάτι͜αμάτια
οξ̌ουκάέξω
οσπίτισπίτι hospitium<hospes
πεσλέεμανπαροχή τροφής, ανατροφή, μεγάλωμα, πάχυνση besleme
πίντςπίνεις
ποίος(ερωτημ.) ποιός, (αναφ.αντων.) όποιος
πουλόποπουλάκι
’ς(ας) από
σίναν(σε τίναν) σε ποιον/α;
σιφτένπρώτα, αρχικά siftah/istiftāḥ
στράτας(ονομ.) δρόμοι, (αιτ.) δρόμους
σύμπιρναπολύ πρωί
τέρτι͜ακαημοί, βάσανα, στενοχώριες dert
τσ̌ίτ’μαντίλι κεφαλής çit
φέρ’φέρνω/ει
φόρ’(προστ.) φόρεσε
’φτάγω(ευτάγω) κάνω, φτιάχνω εὐθειάζω
φύγον(προστ.) φύγε
χ̌ιλι͜άκλερονχιλιάκληρος
χαπάρ’χαμπάρι, είδηση, μαντάτο haber/ḫaber
χαπέρι͜αειδήσεις, νέα haber/ḫaber
χουζάρ’πριόνι hızar<ḫarās
ψ̌ηψυχή
ψ̌όποψυχούλα

Ποντιακός Στίχος - Pontian Lyrics 2024

Τραγούδια: 9056 | Albums/Singles: 1426 | Συντελεστές: 1837 | Λήμματα: 15689
Επικοινωνία: infoDUMMY@pontianlyrics.gr