Έταιρον κι η λυγερή

Έταιρον κι η λυγερή
πάγ’ν όλον τον ποταμόν
Έταιρον επέρνιξεν
κι η κόρη ’κ’ επόρεσεν
-Πέρνιξόν με, έταιρε,
το τσ̌αρκούλι μ’ δίγω σε
-Νι͜ά τσ̌αρκούλιν παίρω σε,
νι͜ά περνήν περνίζω σε
-Πέρνιξόν με, έταιρε,
το τσ̌αρκούλι μ’ δίγω σε
-Άλλο τάγμαν τάξον με
κι ογώ ’σέν περνίζω σε
-Πέρνιξόν με, έταιρε,
το βραχ̌ι͜άλι μ’ δίγω σε
-Ντ’ ευτάγ’ ατο τ’ άκλερον,
τ’ αψιμοκαφώτατον;
Άλλο τάγμαν τάξον με
κι επεκεί περνίζω σε
-Πέρνιξόν με, έταιρε,
το ζωνάρι μ’ δίγω σε
-Το ζωνάρ’ τ’ εσόν ας έν’,
άλλο τάγμαν τάξον με
-Πέρνιξόν με, έταιρε,
το ζωνάρι μ’ δίγω σε
κι ας σην ψ̌η μ’ κι ανώτερον
όλια τ’ άλλα δίγω σε
Ας σο χ̌έρ’ επέρπαξεν
κι ατέν πέραν έσυρεν
-Δος με, κόρη, ντ’ έταξες,
την φιλήν ντ’ ετάγαμε
Έρθαμε κι εξέρθαμε
κι εξεκαμπανίσταμε
Έρθαμε κι εξέρθαμε
κι εξωπλαμπανίγαμε
-Έμπρι͜α μουν λιβάδι͜α είν’,
πάγω ’κεί και δίγω σε
-Έρθαμε κι εξέρθαμε
κι εξεκαμπανίσταμε
Δος με, κόρη, ντ’ έταξες
και ντ’ εσυνετάγαμε
-Έμπρι͜α μουν κοιλάδι͜α είν’,
πάμ’ εκεί και δίγω σε
-Έρθαμε κι εξέρθαμε
κι εξεκαμπανίσταμε
Δος με, κόρη, ντ’ έταξες,
την φιλήν ντ’ ετάγαμε
-Έμπρι͜α μουνε κώμι͜α είν’,
πάμ’ εκεί και δίγω σε
-Αρ’ δος κόρη ντ’ έταξες
και ντ’ εσυνετάγαμε
Έρθαμε κι εξέρθαμε
κι εξεκαμπανίσταμε
-Πέτε͜ ατον τη σ̌κύλ’ τον γιον
ως αδά ντ’ εράευεν;
Δότε͜ ατον ξερά-ξερά
κερμούτσ̌ι͜α και στύπον τάν’
Λάχ̌’ -ιν τρώει, λάχ̌’ μωδι͜ά,
λάχ̌’ την κόρ’ ελεημονι͜ά