Πικρά τα λόγια σ’

Άνοιξον, πουλί μ’, άνοιξον,
άνοιξον το πορτόπο σ’
Απ’ οξ̌ουκά πώς αναμέν’
το σεβνταλίν τ’ αρνόπο σ’!

Άλλαξον, νέτσ̌η, άλλαξον,
ατό το ταπιάτι σ’
Πολλά ασ’ ατο έσυρα
τ’ άσ̌κεμον το νιάτι σ’

Πικρά τα λόγια ντ’ είπες με
έσ̌κιξαν την καρδία μ’
Αν αγαπάς με, πουλόπο μ’,
μη λες ατα͜ αλλομίαν

Άμον θάλασσας κύματα,
πολλά φουρτουνιασμένον
Αέτσ’ έν’ το καρδόπο μου
σα τέρτι͜α φορτωμένον