Τ’ απάν’ αφκά θα φέρω

Προβολή Τραγουδιού

Καλλιτέχνες: Κωνσταντίνος Παπαδόπουλος

Έναν όμορφον κορτσόπον
το καρδόπο μ’ έκαψεν [όι, όι, όι, όι]
Σα μαλλία τ’ς τα ξανθά 
κόκκινον κορδέλαν έν’
’Γώ θα παίρ’ ατεν σ’ εγκάλα̤ μ’,
ατέ για τ’ εμέναν έν’

Εμπροστά σύρ’ τον χορόν,
εμένα θα παλαλών’
Λέ’ ατεναν ξαν εγώ,
«εσέν, πουλί μ’, αγαπώ»

Ντό θα ’ίνουμαι μ’ εσέν;
Ξάι ’κι καλατσ̌εύ’ς εμέν! [όι, όι, όι, όι]
Τσ̌οάπ’ ξάι εμέν ’κι δί’ς με
κι έναν ώραν πώς κλαινί͜εις με
Ντό καρδόπον έ͜εις, πουλί μ’!
έφαες τ’ εμόν την ψ̌ην

Εγώ πόσον αγαπώ σε
εσύ ξαι πώς ’κι νουνί͜εις
Και -ν- ας σον Θεό σ’ θα ’βρήκ’ς α’
αέτσ’ εμέν ντο τυρα̤ννί͜εις

Τ’ απάν’ αφκά θα φέρω,
ψ̌ήκα μ’, εσέν για να παίρω [όι, όι, όι, όι]
Κάθουμαι και απορώ
να ’λέπω την καρδία σ’
Πόσον σκληρόν κι άπονο!
Κρίμαν σην εμορφία σ’

Ωφ! Θα παίρω σε σο γιάνι μ’
και -ν- αφκά -ν- ας σο γιοργάνι μ’
Να ευτάμε εμείς παιδόπα,
έμορφα άμον τ’ αλατόπα

Γλωσσάρι

Κείμενο	Επεξήγηση	Ετυμ. Ρίζα
α’	(ατό) αυτό, το
αέτσ’	έτσι
αλατόπα	(υποκορ.) έλατα
άμον	σαν, όπως, καθώς	ἅμα
απάν’	πάνω
ατέ	αυτή
ατεν	αυτήν
αφκά	κάτω
’βρήκ’ς	(ευρήκ’ς) βρίσκεις
γιάνι	πλάι, πλευρό	yan
γιοργάνι	πάπλωμα	yorgan
δί’ς	δίνεις
έ͜εις	έχεις
εγκάλα̤	αγκαλιά
εμόν	δικός/ή/ό μου	ἐμοῦ
έμορφα	όμορφα
εμορφία	ομορφιά
εμπροστά	μπροστά, πρωτύτερα
έν’	είναι
ευτάμε	κάνουμε, φτιάχνουμε	εὐθειάζω
έφαες	έφαγες
’ίνουμαι	γίνομαι
καλατσ̌εύ’ς	μιλάς, συνομιλείς, συζητάς	keleci=καλός λόγος (Παλαιά Τουρκική Ανατολίας)
καρδόπο	καρδούλα
καρδόπον	καρδούλα
’κι	δεν	οὐκί<οὐχί
κλαινί͜εις	κάνεις κάποιον να κλάψει, στενοχωρείς
κορτσόπον	κοριτσάκι
’λέπω	(ελέπω) βλέπω
νουνί͜εις	σκέφτεσαι
ξάι	καθόλου
ξαν	πάλι, ξανά
παιδόπα	παιδάκια
παίρ’	παίρνω/ει
παίρω	παίρνω
παλαλών’	τρελαίνει
σύρ’	σύρω/ει, τραβάω/ει, ρίχνω/ει
τσ̌οάπ’	απόκριση, αναφορά	cevap/cevāb
τυρα̤ννί͜εις	τυραννάς, ταλαιπωρείς
ψ̌ήκα	ψυχούλα
ψ̌ην	ψυχή