Ποντιακός Στίχος

Προβολή Τραγουδιού

Κατεβάστε τους στίχους σε PDF

Του στουδίτε τα μουράτι͜α

Του στουδίτε τα μουράτι͜αΤου στουδίτε τα μουράτι͜α

Στιχουργοί: Νίκος Σωτηριάδης

Συνθέτες: Μπάμπης Κεμανετζίδης

Καλλιτέχνες: Αλέξανδρος Παρχαρίδης, Αναστάσιος Παρχαρίδης, Μπάμπης Κεμανετζίδης, Στάθης Παρχαρίδης


Απόψ’ είδα έναν όνερον
καταμεσού σο θέρος
Έρθεν έμπρι͜α μ’ ας σο πουθέν
είνας στουδίτες γέρος

Είπ’ εμέναν «Εγώ είμαι
ο Πόντον, η πατρίδα!
Έλα -ν- ας πάμε δείκω σε
όσα τ’ ομμάτι͜α σ’ ’κ’ είδαν»

Κι απέσ’ σον ύπνον το βαθύ
σ’ ονείρου τη σκοτίαν
Σ’ έναν τόπον ευρέθαμε
ση μέσεν με το μίαν

Δεξι͜ά, κάστρον χρυσόχτιστον
λιβάδι͜α χλοϊσμένα
Ζεβρι͜ά, μόνον χαλάσματα
και καταματωμένα
Σο κάστρον κόσμος μελισσεύ’
και μουχαπέτι͜α ’ίν’νταν
και σ’ άλλο στούδι͜α άθαφτα
απάν’ σο χώμαν κείνταν

Τερεί δεξι͜ά, τερεί ζεβρι͜ά
μοιρολογεί και κλαίει
Σ’ εμέν μερέαν κλώσ̌κεται
μονολογεί και λέει:

«Τέρεν πώς έμ’ κι εφώταζα
τσ’ ανατολής αστρόπον
και τέρεν πώς ερήμαξαν
αλλόθρησκοι τον τόπον!»

-Απ’ εμέν πέει με γέροντα
ντό θέλτς και ψαλαφάς;
-Θέλω γι’ αούτο το κακόν
εσύ πα κάτ’ να ’φτάς!

Το αίμα μ’ να κρατείς ζωγρόν
και τη γερὰ μ’ ταζέσσα
Τα λώματα αδι͜άκλυστα
τη θύμηση μ’ γερέσσα
Να σπέρτς πατρίδας σπορικόν
σου μιλετί’ τα κάρδι͜ας
κι ατό τον μονοκέφαλον
ζωγράφ’σον σ’ εμπροκάρδι͜α σ’

Ακρίτας ι-μ’ να ’ίνεσαι
ση ψ̌ης ι-μ’ τα συνόρι͜α
Να στείλς μακρά σον άκλωστον
ατόν ντο βάλ’ συμπόδι͜α

Κι αν δί’ κάποτε ο Θεόν
να ξαναχτί͜εις το κάστρο μ’
και να εβγαίν’ σον ουρανόν
και ξαν φωτάζ’ το άστρο μ’!
Γλωσσάρι
ΚείμενοΕπεξήγησηΕτυμ. ΡίζαΠροέλευση
αδι͜άκλυσταπου δεν έχουν ξεπλυθεί με νερό, άπλυτα
άκλωστοναγύριστο
αούτοαυτό/ή
απάν’πάνω
απέσ’μέσα
αστρόποναστεράκι
γερὰπληγή, τραύμα yara
γερέσσαγερή
δείκωδείχνω, καταδεικνύω
δί’δίνει
εβγαίν’βγαίνει
είναςένας/μία
έμ’ήμουν
έμπρι͜αμπροστά
εμπροκάρδι͜ατα στήθη, το μέρος έμπροσθεν της καρδιάς
έρθενήρθε
ευρέθαμεβρεθήκαμε
ζεβρι͜άαριστερά
ζωγράφ’σον(προστ.) ζωγράφισε
θέλτςθέλεις
θέροςκαλοκαίρι
’ίνεσαιγίνεσαι
’ίν’ντανγίνονται
’κ’δεν οὐκί<οὐχί
καταμεσούκαταμεσής
κείντανκείτονται, ξαπλώνουν
κλώσ̌κεταιγυρίζει, επιστρέφει
λώματαρούχα λῶμα/λωμάτιον
μακρά(επιρρ.) μακριά, (επιθ.) μακρινά, απομακρυσμένα
με το μίανμονομιάς
μελισσεύ’θορυβεί, οχλαγωγεί (σαν σμήνος μελισσών)
μερέανμεριά
μέσενμέση
μίανμια φορά
μιλετί’φυλής, έθνους millet
μουχαπέτι͜ακουβέντες, φιλικές συνομιλίες, συνεκδ. φιλικές συνεστιάσεις (συνήθως μετά μουσικής) muhabbet/maḥabbet
ξανπάλι, ξανά
ξαναχτί͜ειςξαναχτίζεις
ομμάτι͜αμάτια
όνερονόνειρο
όσαόσες φορές
παπάλι, επίσης, ακόμα
πέει(προστ.) πες
πουθένπουθενά
σκοτίανσκοτάδι
σπέρτςσπέρνεις
σπορικόνσπόρο
στούδι͜αοστά, κόκκαλα ὀστοῦν~οστούδιον
στουδίτεςοστέινος, κοκκαλιάρης ὀστοῦν~οστούδιον
συμπόδι͜αεμπόδια
συνόρι͜ασύνορα
ταζέσσαφρέσκια, ζεστή taze/tāze
τερείκοιτάει
τέρεν(προστ.) κοίταξε
τσ’(ως τση, άρθρο γεν. ενικού) του/της, (ως τσοι, άρθρο αιτ. πληθ.) τις, (ως ερωτημ. τσί;) ποιός;
’φτάς(ευτάς) κάνεις, φτιάχνεις εὐθειάζω
φωτάζ’φωτίζει, λάμπει
ψαλαφάςζητάς, αιτείσαι
ψ̌ηςψυχής

Ποντιακός Στίχος - Pontian Lyrics 2025

Τραγούδια: 9665 | Albums/Singles: 1749 | Συντελεστές: 2000 | Λήμματα: 15822
Επικοινωνία: infoDUMMY@pontianlyrics.gr