Τη τσοπάν’ η τραγωδία

Προβολή Τραγουδιού

Συνθέτες: Adem Ekiz

Καλλιτέχνες: Adem Ekiz, Φίλιππος Κεσαπίδης

Έικιτι, Καζάνκιραν¹,
τα χ̌ιόνι͜α σ’ είν’ λιωμένα -ι
Έχ̌’ έρ’ται κι εγβαίν’ η ψ̌η μ’ [όι]
τα παπούτσ̌ι͜α μ’ δεμένα -ι

Δύο-τρία στρώματα -ι
ση ράχ̌ι͜α μ’ στοιβαγμένα -ι
’υναίκα μ’, τα παιδία μ’, [όι]
όλ’ πα/να κλαίουν εμενά -ι

Τα πρόατα μ’ σην πόρτα -ι
περ’μένουνε εμένα -ι
Ο σ̌κύλον μοιρολογά [όι]
νά ’ρται ελέπ’ εμένα -ι

Τα γουρνία μ’ σην οντά -ι
είναι ευκαιρωμένα -ι
Σον παρχάρ’ τα σταλία [ούι]
στέκουνε κλειδωμένα -ι

Αζραΐλης² πα περ’μέν’
νά ’ρται επαίρ’ εμένα -ι
Ο Χάρον περ’μένει με -ι
νά ’ρται επαίρ’ εμένα -ι
Κιουναχιά³ ουκ̌’ εποίκα [ούι]
ο Ρεμπής⁴ μετ’ εμένα -ι
Αμαρτία ’κ’ εποίκα [ούι]
ο Θεός μετ’ εμένα -ι

Η μάνα μ’ και ο κύρη μ’
περ’μένουνε εμένα -ι
Το ταφί μ’, τα σανίδι͜α μ’ [όι]
όλα είν’ ’τοιμαγ̆μένα -ι

Ντο έζησα, έζησα -ι,
Θεέ μ’, έπαρ’ εμένα -ι
Τα χρόνι͜α εκόπανε [όι]
σον κόσμον για τ’ εμένα -ι

Γλωσσάρι

Κείμενο	Επεξήγηση	Ετυμ. Ρίζα
γουρνία	γούρνες, ποτίστρες ζώων
εγβαίν’	βγαίνει
έικιτι	έκφραση αναπόλησης που υποδηλώνει νοσταλγία για κάτι παρελθοντικό ή εκδήλωση συμπόνοιας για κάποιον	hey gidi
είν’	(για πληθ.) είναι
εκόπανε	κοπήκαν
ελέπ’	βλέπει/βλέπω
επαίρ’	παίρνει
έπαρ’	(προστ.) πάρε
εποίκα	έκανα, έφτιαξα	ποιέω-ῶ
έρ’ται	έρχεται
ευκαιρωμένα	αδειασμένα
έχ̌’	έχει
’κ’	δεν	οὐκί<οὐχί
μετ’	μαζί με (με αιτιατική), με (τρόπος)
όλ’	όλοι/α
οντά	δωμάτιο	oda
ουκ̌’	(ιδιωμ. Όφη) δεν	ουκί<οὐχί
πα	πάλι, επίσης, ακόμα
παιδία	παιδιά
παρχάρ’	ορεινός τόπος θερινής βοσκής
περ’μέν’	περιμένει
περ’μένουνε	περιμένουν
πρόατα	πρόβατα
ράχ̌ι͜α	ράχη, πλάτη
σταλία	καλύβες
ταφί	τάφο
ψ̌η	ψυχή

Σημειώσεις

¹ (Kazankıran yayla - Çaykara - Trabzon) Παρχάρι της περιοχής Όφεως (φωτό)
² (τουρκ. Azrail) Ο άγγελος του θανάτου, ανάλογο του Χάροντας
³ (τουρκ. günah) Αμαρτία
⁴ (αραβ.) Θεός

Προβολή Τραγουδιού

Τη τσ̌οπάν’ η τραγωδία