Απ’ αδά και πέρα ούτε καλημέρα

Προβολή Τραγουδιού

Καλλιτέχνες: Κώστας Πουτακίδης, Μπάμπης Κεμανετζίδης

Για τ’ εσά τ’ ομμάτι͜α
είχα εγώ μουράτι͜α
μετ’ εσέν να χτίζω τη ζωή μ’
Εσέν να κερδίζω
όρκον κι αν επέρα,
απ’ αδά και πέραν
ούτε «καλημέρα»

Απ’ αδά και πέραν
ούτε «καλημέρα»
και σουμά σ’ εμέν να μη κονεύ’ς
Κι έναν να θυμάσαι
όθεν κι αν κοιμάσαι
την εγκάλια μ’ πάντα θ’ αραεύ’ς

Ντ’ έλεες εποίν’να,
για τ’ εσέν εζήν’να
και πάντα εγίνουτον τ’ εσόν
Τώρα καλατσ̌εύω
και τερείς σο πέραν
απ’ αδά και πέραν
ούτε «καλημέρα»

Απ’ αδά και πέραν
ούτε «καλημέρα»
και σουμά σ’ εμέν να μη κονεύ’ς
Κι έναν να θυμάσαι
όθεν κι αν κοιμάσαι
την εγκάλια μ’ πάντα θ’ αραεύ’ς

Εγώ απ’ εσένα
πάντα ενεμένα
για τ’ εμέν καλόν λόγον να λες
Έναν βήμαν έμ’νε
να φορώ σε βέραν
απ’ αδά και πέραν
ούτε «καλημέρα»

Απ’ αδά και πέραν
ούτε «καλημέρα»
και σουμά σ’ εμέν να μη κονεύ’ς
Κι έναν να θυμάσαι
όθεν κι αν κοιμάσαι
την εγκάλια μ’ πάντα θ’ αραεύ’ς

Γλωσσάρι

Κείμενο	Επεξήγηση	Ετυμ. Ρίζα
αδά	εδώ
αραεύ’ς	ψάχνεις, αναζητάς, γυρεύεις	aramak
εγίνουτον	γινόταν
εγκάλια	αγκαλιά
εζήν’να	ζούσα
έλεες	έλεγες
έμ’νε	ήμουν
ενεμένα	περίμενα, ανέμενα
επέρα	πήρα
εποίν’να	έκανα, έφτιαχνα	ποιέω-ῶ
εσά	δικά σου/σας
εσόν	δικός/ή/ό σου
καλατσ̌εύω	μιλάω, συνομιλώ, συζητώ	keleci=καλός λόγος (Παλαιά Τουρκική Ανατολίας)
κονεύ’ς	εγκαθίστασαι, φωλιάζεις, προσγειώνεσαι	konmak
μετ’	μαζί με (με αιτιατική), με (τρόπος)
μουράτι͜α	επιθυμίες, πόθοι	murat/murād
όθεν	όπου, οπουδήποτε, σε όποιον
ομμάτι͜α	μάτια
σουμά	κοντά
τερείς	κοιτάς