Μα την Παναΐαν

Προβολή Τραγουδιού

Όλια τα «αχ» τ’ εμέτερα, εγένταν τραγωδίας

expand_content

Τα ραχ̌ι͜ά εντιδόνεσαν
[Γιαρ, γιαρ, τσ̌άνουμ, γιαρ, γιαρ]
και με την τραγωδία μ’
[Μα την Παναΐαν λέγω]
Έλα να χ̌αίρεται, πουλί μ’,
[Γιαρ, γιαρ, τσ̌άνουμ, γιαρ, γιαρ]
τ’ έρημον η καρδία μ’
[Μα την Παναΐαν λέγω]

Τ’ ομάλι͜α εγώ εγόμωσα
[Γιαρ, γιαρ, τσ̌άνουμ, γιαρ, γιαρ]
για τ’ εσέν τραγωδίας
[Μα την Παναΐαν λέγω]
Έλα και βάλον σπλάχνωσην
[Γιαρ, γιαρ, τσ̌άνουμ, γιαρ, γιαρ]
Σ’ έρημον την καρδία σ’
[Μα την Παναΐαν λέγω]

Σε καθαέναν ορμόπον
[Γιαρ, γιαρ, τσ̌άνουμ, γιαρ, γιαρ]
πίνω κρύον νερόπον
[Μα την Παναΐαν λέγω]
Ετέρεσα τα στράτας ι-σ’
[Γιαρ, γιαρ, τσ̌άνουμ, γιαρ, γιαρ]
Πού επέμ’νες, πουλόπο μ’;
[Μα την Παναΐαν λέγω]

Γλωσσάρι

Κείμενο	Επεξήγηση	Ετυμ. Ρίζα
βάλον	(προστ.) βάλε
γιαρ	αγαπητός/ή/ό, αγάπη	yâr
εγόμωσα	γέμισα
εντιδόνεσαν	αντιδόνησαν
επέμ’νες	απόμεινες
ετέρεσα	κοίταξα
καθαέναν	καθένα
νερόπον	νεράκι
ομάλι͜α	(επιρρ.) ομαλά, ευθεία, πεδιάδες, ίσια
ορμόπον	μικρό ρυάκι/μικρή ρεματιά
πουλόπο	πουλάκι
ραχ̌ι͜ά	ράχες, βουνά
σπλάχνωσην	ευσπλαχνία, συμπόνια
στράτας	(ονομ.) δρόμοι, (αιτ.) δρόμους
τραγωδία	τραγούδι
τραγωδίας	τραγούδια
τσ̌άνουμ	ψυχή μου, αγαπημένε/η μου	canım<can/cān