Φίλεμαν εψαλάφεσα

Προβολή Τραγουδιού

Φίλεμαν εψαλάφεσα,
εποίκε με ταζίρι
Εκλώστα επαρακάλεσα,
έλυσεν το νεζίρι

Ατέ εκλώστεν (κι) είπε με,
«Να ελιά σε ο Θεός -ι!
Φίλεμαν πάντα ψαλαφάς
αρ’ άμον γυρευός -ι!»

Επαρακάλ’νεν κι έλεεν,
«Ε! Γιάννε, μη φιλείς με!
Μεθείς και τραγωδείς ατο,
σον κύρη μ’ παραδί’ς με»

Εκλώστα εγώ κι είπα ’τεν
«Πώς εχάσες το νου σ’ -ι!
Καμίαν παραδίω σε
και χάνω το ναμούσι σ’;»

Οτότε -ν- εγκαλιάστε με
και ας σα μέσα κέσ’ -ι
Είπε με, «Γιάννε πού θα πας;
Ας είμες αδακέσ’ -ι»

Εχπάστα να δι͜αβαίνω πλάν
είπε με «Πού θα πας-ι;
Θα ’φτάς με και θα βλαστημώ
το σεβνταλούκ’ ντ’ ευτάς-ι»

Γλωσσάρι

Κείμενο	Επεξήγηση	Ετυμ. Ρίζα
αδακέσ’	εδώ γύρω, κάπου εδώ
άμον	σαν, όπως, καθώς	ἅμα
ατέ	αυτή
γυρευός	επαίτης, ζητιάνος
δι͜αβαίνω	(για τόπο) περνώ, διασχίζω, (για χρόνο) περνώ	διαβαίνω
εγκαλιάστε	αγκάλιασε
είμες	είμαστε
εκλώστα	γύρισα, επέστρεψα
εκλώστεν	γύρισε, επέστρεψε
έλεεν	έλεγε
ελιά	λυπάται κπ/κτ, δείχνει ελεημοσύνη, μτφ. τσιγκουνεύεται	ἐλεέω-ἐλεῶ
επαρακάλεσα	παρακάλεσα
επαρακάλ’νεν	παρακαλούσε
εποίκε	έκανε, έφτιαξε	ποιέω-ῶ
ευτάς	κάνεις, φτιάχνεις	εὐθειάζω
εχπάστα	αναχώρησα, κίνησα για
εψαλάφεσα	ζήτησα, αιτήθηκα
καμίαν	ποτέ
κέσ’	εκεί μέσα, προς τα εκεί	κέσου<κεῖσ’<κεῖσε<ἐκεῖσε
μεθείς	μεθάς
ναμούσι	τιμή, υπόληψη, εντιμότητα	namus/nāmūs<νόμος
νεζίρι	όρκος, υπόσχεση, τάμα	nezir/neẕr
οτότε	τότε
παραδίω	παραδίνω
πλάν	πλάι, πλαϊνό/ παρακείμενο μέρος, παραπέρα
σεβνταλούκ’	έρωτας	sevdalık
ταζίρι	επίπληξη	azar/āzār
’τεν	αυτήν
τραγωδείς	τραγουδάς
φιλείς	φιλάς
φίλεμαν	φιλί
’φτάς	(ευτάς) κάνεις, φτιάχνεις	εὐθειάζω
ψαλαφάς	ζητάς, αιτείσαι