Τα μαλλόπα σ’ κοντά πλεχτά

Προβολή Τραγουδιού

Τα μαλλόπα σ’ κοντά πλεχτά,
κοπανίζ’νε τ’ ωμία σ’
[Έλα -ν- έλα / Πάτ’ και δέβα]
Να έμ’νε χρυσόν σκουλαρίκ’
κι αρ’ εμπαίν’να σ’ ωτία σ’
[Έλα -ν- έλα / Πάτ’ και δέβα]

Όλιον τη νύχταν λάσκουμαι,
ν’ αηλί τ’ εμά τα χάλια!
[Έλα -ν- έλα / Πάτ’ και δέβα]
Θα έρχουμαι γνεφίζω σε
και σα πετεινολάλι͜α
[Έλα -ν- έλα / Πάτ’ και δέβα]

Το παραθύρι σ’ ανοιχτόν,
η λάμπα απέσ’ φωτάζει
[Έλα -ν- έλα / Πάτ’ και δέβα]
Ελέπω σε, μικρόν αρνί μ’,
μαναχόν πώς νυστάζεις
[Έλα -ν- έλα / Πάτ’ και δέβα]

Γλωσσάρι

Κείμενο	Επεξήγηση	Ετυμ. Ρίζα
αηλί	αλίμονο	ἀ- + μεσαιωνική ελληνική ἠλί < εβραϊκά אל (θεός)
απέσ’	μέσα
γνεφίζω	ξυπνώ
δέβα	(προστ.) πήγαινε
ελέπω	βλέπω
εμά	δικά μου
έμ’νε	ήμουν
έρχουμαι	έρχομαι
κοπανίζ’νε	κοπανάνε, χτυπούν πάνω σε
λάσκουμαι	περιφέρομαι, τριγυρίζω, περιπλανώμαι	ἀλάομαι/ηλάσκω
μαλλόπα	μαλλάκια
μαναχόν	(έναρθρο) μοναχός, μοναχό, (επίρρ) μόνο/μοναχά
ν’ αηλί	αλίμονο	μεσαιων. ελλ. ἀλί<ἀ- + ἠλί (εβραϊκά אל)= θεός
όλιον	όλο, ολόκληρο
πάτ’	(προστ.) πάτησε, πάτα
πετεινολάλι͜α	χαράματα, η ώρα που λαλούν οι πετεινοί
φωτάζει	φωτίζει, λάμπει
ωμία	ώμοι
ωτία	αυτιά