Θέλω ν’ αλλάζω τ’ όνεμα μ’

Προβολή Τραγουδιού

Καλλιτέχνες: Κώστας Θεοδοσιάδης, Μιχάλης Καλιοντζίδης

Θέλω ν’ αλλάζω τ’ όνεμα μ’,
το παλαιόν ν’ αφήνω
Γιατί εκείνον αν έχ’ ατο
κι άλλα δάκρυ͜α θα ’κχ̌ύνω

Θ’ απιδι͜αβαίνω τη σεβντάν
και θα καλογερεύω
Να πάω σο Θεόν σιμά
την ψ̌η μ’ να κουρταρεύω

Θέλω να ανασπάλω σε,
ντ’ επόνεσα κανείται
Εγεραλάεψεν η ψ̌η μ’
τον τόπον όθεν κείται

Αρνί μ’, θα ξενιτεύκουμαι
μακρά μέρος θα πάω
Όσον ευρίουμαι σουμά σ’
έναν κακόν θα ’φτάω

Θέλω να ξεριζώνω σε,
σεβντά, ας σην καρδία μ’
Τσ̌άπαν έχασα τον καιρό μ’,
θα χάνω και την υεία μ’

Γλωσσάρι

Κείμενο	Επεξήγηση	Ετυμ. Ρίζα
ανασπάλω	ξεχάσω
απιδι͜αβαίνω	φεύγω, αφήνω πίσω, προσπερνώ, ξεπερνώ	από + διαβαίνω
εγεραλάεψεν	πλήγωσε, τραυμάτισε	yaralamak
ευρίουμαι	βρίσκομαι
καλογερεύω	αποσύρομαι από τα εγκόσμια, γίνομαι καλόγερος
κανείται	φτάνει, είναι αρκετό
κείται	κείτεται, ξαπλώνει
κουρταρεύω	σώνω, διασώζω	kurtarmak
’κχ̌ύνω	εκχύνω, χύνω, εκβάλλω	εκχύνω<ἐγχέω< ἐν + χέω
μακρά	(επιρρ.) μακριά, (επιθ.) μακρινά, απομακρυσμένα
ξενιτεύκουμαι	ξενιτεύομαι
όθεν	όπου, οπουδήποτε, σε όποιον
όνεμα	όνομα
σεβντά	αγάπη, έρωτας	sevda/sevdā
σεβντάν	αγάπη, έρωτα	sevda/sevdā
σουμά	κοντά
τσ̌άπαν	τζάμπα, δωρεάν, μάταια	caba/cabāˀ
υεία	υγεία
’φτάω	(ευτάω) κάνω, φτιάχνω	εὐθειάζω
ψ̌η	ψυχή