Γράμμαν γράφτω και στείλω σε

Προβολή Τραγουδιού

Γράμμαν γράφτω και στείλω σε,
ας σο καρδόπο μ’ αίμαν
Εσύ κόψον και στείλον με
τη σπαρελί’ σ’ το δέμαν

Όντες φορεί και -ν- αναλλάζ’
και πάει σην εκκλησίαν
να ποδεδίζω ντο ευτάει
την γονατοκλισίαν

Πολλά ραχ̌ι͜ά χωρίζ’νε μας
και ’κ’ έχ’νε τελεσίαν
Τα γράμματα χαΐρ’ ’κ’ ευτάν’,
πουλί μ’, σην μαναχ̌ίαν

Πουλόπο μ’, έπαρ’ το μαχ̌αίρ’
έλα, σ̌κίσον και τέρεν
τ’ έρημον το καρδόπο μου,
άψιμον πώς επέρεν!

Γλωσσάρι

Κείμενο	Επεξήγηση	Ετυμ. Ρίζα
αναλλάζ’	φοράει τα καλά/γιορτινά ρούχα
άψιμον	φωτιά
γονατοκλισίαν	γονυκλισία
έπαρ’	(προστ.) πάρε
επέρεν	πήρε
ευτάει	κάνει, φτιάχνει	εὐθειάζω
ευτάν’	κάνουν, φτιάχνουν	εὐθειάζω
έχ’νε	έχουνε
’κ’	δεν	οὐκί<οὐχί
καρδόπο	καρδούλα
κόψον	(προστ.) κόψε
μαναχ̌ίαν	μοναξιά
μαχ̌αίρ’	μαχαίρι
να ποδεδίζω	να χαρώ κπ
όντες	όταν
ποδεδίζω	(ενεργ. και μέση) χαίρομαι, απολαμβάνω, προσκυνώ	από+δέδιν (<δείδω=φοβάμαι, ανησυχώ)
πολλά	(επίθ.) πολλά, (επίρρ.) πολύ
πουλόπο	πουλάκι
ραχ̌ι͜ά	ράχες, βουνά
σ̌κίσον	σκίσε (προστ.)
σπαρελί’	σπαρελιού (βλ.σπαρέλιν)	spalliera
στείλον	(προστ.) στείλε
τελεσίαν	τέλος, τελειωμό
τέρεν	(προστ.) κοίταξε
χαΐρ’	προκοπή, καλή τύχη, ευημερία	hayır/ḫayr
χωρίζ’νε	χωρίζουν, ξεδιαλέγουν