Aus der Umgebung von Kerasunt - Τη ψεύτα το παιδίν

Έταν δύ’ς ψεύτοι. Ο εις είπεν: «ας πάγω ευρήκω τον άλλον τον ψεύτεν· εγώ εξέρω ασ’ εκείνον πλέα ψέματα λέγω». Επήγεν εύρεν τ’ οσπίτ’ν ατ’ κι εκεί ’κ’ έτον άλλος ο ψεύτες. Εύρεν το παιδόπον τη ψεύτα και ερώτεσεν ατο, «ο τα̤τά̤ σ’ μέρ’ έν’;». Είπεν ατον κι εκείνο: «Ουρανόν ετσερίγ̆εν και ο κύρη μ’ επήρεν βελόν’ και ράμμαν κι επήγεν να παλαγών’ τον ουρανόν». Ενούντσεν ο ψεύτες: «Το μωρόν ατ’ ούνταν εξέρ’ ατόσα ψέματα, ο κύρ’ς ατ’ πόσον θα εξέρ’;» και εφέκεν και εδέβεν πλάν.