Τη Καρσί’ τραγωδίας

Προβολή Τραγουδιού

Καλλιτέχνες: Γιώργος Τσιφτελίδης, Μπάμπης Κεμανετζίδης

Θ’ αρχινώ τραγωδίας,
τη Καρσί’ ιστορίας
Τραγώδι͜α σ̌ονλικλία
για τ’ όλι͜α τα χωρία

Εντάμαν τραγωδέστεν,
μετ’ εμέν κάτ’ πετέστεν
Ας λέγουμ’ και γελούμε
όσον ντο επορούμε

Χαραμί Βαρτάν, Κιόλι͜α
και τα χωρία όλι͜α
Παλληκάρι͜α γερλία,
κορτσόπα μερακλία

Τραγωδούν και γελούνε,
σα χαράντας πετούνε
Σ’ έναν σ’ άλλο ιγεύ’νε,
λένε και μασχαρεύ’νε

Τσ̌ιαπίκ’ και Ορτάκιοϊ,
Γαράκλισε και Όλτι
Όλ’ ατουν μερακλήδες,
τραγωδι͜άν’ και κεφλήδες

Τ’ οσπίτι͜α γουρεμένα,
τα τραπέζι͜α στρωμένα
Τραγωδούν και γελούνε,
όσον πόσον θα ζούνε;

Όλ’ α̤τουν οι Καρσλήδες
χορευτι͜άντ’ μερακλήδες
Αγαπούν κι αγαπίγουν
σ’ όλι͜α κέσ’ πα ευρίγουν

Φάτε όλ’ και πιάτε,
άλλο τιδέν μ’ ευτάτε
Ο Χάρον αναμέν’ μας,
τιδέν ’κι θ’ απομέν’ μας

Γλωσσάρι

Κείμενο	Επεξήγηση	Ετυμ. Ρίζα
αγαπίγουν	αγαπιούνται
αναμέν’	περιμένει
απομέν’	απομένει
ατουν	τους
γερλία	ντόπια, τοπικά, ιθαγενή	yerli
εντάμαν	μαζί
επορούμε	μπορούμε
ευρίγουν	βρίσκονται
ευτάτε	κάνετε, φτιάχνετε	εὐθειάζω
ιγεύ’νε	ταιριάζουν	uymak
Καρσί’	του Καρς
κέσ’	εκεί μέσα, προς τα εκεί	κέσου<κεῖσ’<κεῖσε<ἐκεῖσε
κεφλήδες	κεφάτοι	keyifli<keyif/keyf
’κι	δεν	οὐκί<οὐχί
κορτσόπα	κοριτσάκια
λέγουμ’	λέμε
μασχαρεύ’νε	αστειεύονται, διακωμωδούν	maskara/masḫara
μερακλία	με μεράκι, με ιδιαίτερο ζήλο	meraklı/merāḳ
μετ’	μαζί με (με αιτιατική), με (τρόπος)
όλ’	όλοι/α
όσον πόσον	πόσο πια; μέχρι πότε;
οσπίτι͜α	σπίτια	hospitium<hospes
πα	πάλι, επίσης, ακόμα
πετέστεν	(προστ.) πείτε
πιάτε	(προστ.) πιείτε
σ̌ονλικλία	χαρούμενα, γιορτινά	şenlikli
τιδέν	τίποτα
τραγωδέστεν	(προστ.) τραγουδήστε
τραγωδι͜άν’	τραγουδιστές
τραγωδίας	τραγούδια
τραγωδούν	τραγουδάνε
χαράντας	χαρές, γάμοι
χορευτι͜άντ’	χορευτές, χορευταράδες
χωρία	χωριά