Ση Σάντας τα ψηλά ραχ̌ιά

Ση Σάντας τα ψηλά ραχ̌ιά
όθεν αητοί φωλιάζ’νε
τ’ Ευκλείδη τα παλληκάρι͜α
νυχτοήμερα -ν- ωρι͜άζ’νε
[Ντό, ντό, ντο κι αμ’ ντο;]
νυχτοήμερα -ν- ωρι͜άζ’νε

Ωρι͜άζ’νε, ’κι φογούντανε
νέ χ̌ιόνι͜α, νέ βρεχ̌ία,
ούτε τη / του Κάλφα τ’ άρματα
και τ’ άγρι͜α τα κατσία
[Ντό, ντό, ντο κι αμ’ ντο;]
και τ’ άγρι͜α τα κατσία

Ευκλείδης ’κ’ εφογούτονε
μαχ̌αίρι͜α και σπαθία
Ατός ετόν π’ ερίαζεν
τη Σάντας τα χωρία
[Ντό, ντό, ντο κι αμ’ ντο;]
τη Σάντας τα χωρία

♫

Μάνα, δὼμα την ευχ̌ή σ’
και του κύρη μ’ το μαρτέν’
Η Σαντά ντο θα γεννά
σο ραχ̌ίν πρέπ’ να εβγαίν’

Δὼμα τα τσ̌άπουλας ι-μ’,
τα σ̌αγ̆ιάκια μ’, τ’ ορτάρι͜α μ’
Ληγάρι͜α θ’ αχπάσκουμαι
και με τα παλληκάρι͜α μ’

Μα τη ζίπκαν ντο φορώ!
Μα το κράτω το μαρτέν’!
Ας σην Σάνταν απεσ̌κέσ’
ο Τούρκον ’κι θα δι͜αβαίν’

♫

Η λαλία μ’ σον ουρανόν
[ν’ αηλί εμέν!]
αρνόπο μ’, έλα -ν- έλα
[έλα -ν- έλα]
σα μὲσα σ’ να τυλίγουμαι
[ν’ αηλί εμέν!]
εσύ τέρ’ με και γέλα
[’μώ το νόμο σ’!/έλα -ν- έλα]

Τραβωδώ, μάνα μ’, τραβωδώ
[ν’ αηλί εμέν!]
τραβωδώ μερακλία
[έλα -ν- έλα/πάτ’ και δέβα]
Σο καρδόπο μ’ εφύτρωσαν
[ν’ αηλί εμέν!]
δεντρά με τα κλαδία
[έλα -ν- έλα/’μώ το νόμο σ’!]

Αν αποθάνω θάψτε με,
[ν’ αηλί εμέν!]
σύρ’τεν απάν’ ι-μ’ χώμαν
[έλα -ν- έλα/’μώ το νόμο σ’!]
Αφήστε με παράθυρον
[ν’ αηλί εμέν!]
να ελέπω την τρυγόνα μ’
[έλα -ν- έλα/πάτ’ και δέβα]

♫

Όντες πας σην Τσερκόβιαν¹
δι͜αβαίντς την Καστανέαν
Εκεί είναι πολλοί Σαντέτ’
μυρίζ’ μανουσ̌ακέαν

Ε! Παύλο Κυφωνίδη,
με το ψιλόν τη λαλίαν
Για πάτ’ μας έναν ύβριγμαν
και με έναν / την τραβωδίαν

Λελεύω σε, Καστανέα,
με τα κρύα νερά σ’!
Λελεύω τον ανέφορο σ’,
ίλιαμ την Σουμελά σ’

Ε! Ρίτο Ανδρεάδη,
με το μαύρον το μουστάκ’
για έπαρ’ την Ελένεν
και -ν- έλα σο παρακάθ’

Ση Καστανέας τα ραχ̌ι͜ά
θα χτίζω έναν φωλέαν,
θα σ̌υρίζω και τραβωδώ
απάν’ σ’ έναν οξέαν

Ε! Γιάννε Γρηγοριάδη,
με τα άσπρα τα μαλλία
Λελεύω/Να λελεύω τα νεότητα σ’
τρώγω τ’ εσά τα ψ̌ήα

Ση Καστανέας τα ραχ̌ι͜ά
να έμ’νε έναν οξέαν
να εποίν’να παχ̌ύν σι͜αρίν
σ’ εμόν τον ξενιτέαν

Ε! Τάκη Ανδρεάδη,
π’ έχασες τον αδελφό σ’
Όλ’ εμείς είμες αδέλφι͜α,
πασ̌κείμ’ είσαι μαναχός;