Προβολή Τραγουδιού

Ο γαμπρόν κι όλον το αλάι

Καλλιτέχνες: Βέφα Μιχαηλίδου, Παναγιώτης Ασλανίδης

Ο γαμπρόν κι όλον το αλάι
σο νυφέπαρμαν θα πάει
Παίζ’ η λύρα, κρούει ταούλ’,
σο χορόν εμπαίν’νε ούλ’

Και τ’ αδέλφι͜α κι εξαδέλφι͜α
εμπροστά χορεύ’νε Τας
Κι ο γαμπρόν δασ̌κεύ’ τη νύφεν
τίναν θα κρατεί το μάχ̌

Τα συμπαίδι͜α τραγωδούν
και ρακίν σο χ̌έρ’ κρατούν
Πίν’ ατο άμον νερόν,
τη σεβτάς το τέρτ’ λαρών’

Και τ’ αδέλφι͜α κι εξαδέλφι͜α
εμπροστά χορεύ’νε Τας
Κι ο γαμπρόν δασ̌κεύ’ τη νύφεν
τίναν θα κρατεί το μάχ̌

Ο γαμπρόν άμον αητός,
παλληκάρ’, καματερός
Και η νύφε άμον τσ̌ιτσ̌άκ’,
τουτουγιάν’ έν’ μανουσ̌άκ’

Και τ’ αδέλφι͜α κι εξαδέλφι͜α
εμπροστά χορεύ’νε Τας
Κι ο γαμπρόν δασ̌κεύ’ τη νύφεν
τίναν θα κρατεί το μάχ̌

Γλωσσάρι

Κείμενο	Επεξήγηση	Ετυμ. Ρίζα
άμον	σαν, όπως, καθώς
δασ̌κεύ’	κατηχώ/ει
εμπαίν’νε	μπαίνουν
εμπροστά	μπροστά, πρωτύτερα
έν’	είναι
κρατεί	κρατάει, βαστάει, στέκει, αντέχει
κρούει	χτυπάει
λαρών’	γιατρεύει, θεραπεύει
μανουσ̌άκ’	μενεξές/βιολέτα	մանուշակ (manušak)<manafšak
μάχ̌	έθιμο κατά το οποίο η νύφη ως ένδειξη σεβασμού δεν απηύθυνε τον λόγο στα πεθερικά της και δεν τους κοιτούσε στα μάτια
νύφε	νύφη
νύφεν	νύφη
νυφέπαρμαν	το έθιμο όπου ο γαμπρός πάει παίρνει τη νύφη από το σπίτι της για να πάνε στην εκκλησία
ούλ’	όλοι
πίν’	πίνει
ρακίν	αλκοολούχο ποτό που παράγεται από τη ζύμωση φρούτων ή στεμφύλων φρούτων	rakı/ˁaraḳī
σεβτάς	αγάπης, έρωτα	sevda/sevdā
συμπαίδι͜α	συνομήλικοι
ταούλ’	νταούλι	davul/ṭabl
Τας	ονομασία αντικρυστού ποντιακού χορού
τέρτ’	καημός, βάσανο, στενοχώρια (ονομ.)	dert
τίναν	ποιον/α
τουτουγιάν’	το φυτό αμάραντος (Helichrysum stoechas – Ελίχρυσος ο πολύτιμος)	dudiye otu/tutuya
τραγωδούν	τραγουδάνε
τσ̌ιτσ̌άκ’	λουλούδι	çiçek
χ̌έρ’	χέρι
χορεύ’νε	χορεύουν