Έμορφον εγάπ’

Προβολή Τραγουδιού

Αρνί μ’, τ’ έμορφον η εγάπ’
’κι θέλ’ τέρτι͜α και πόνον
Εγάπ’ θέλ’ να καϊμλιαεύ’
όσον δι͜αβαίν’ ο χρόνον

Να δί’ χ̌έρι͜α να πορπατούν
σα στράτας στέρι͜α-στέρι͜α
Ους να πετούν σον ουρανόν
κι ευρίουνταν σ’ αστέρι͜α

Καρδι͜άς να ευτάει να χ̌αίρουνταν
κι εγκάλιας να μονάζ’νε
Χ̌είλια πλατέα να γελούν
κι ομμάτι͜α να φωτάζ’νε

Να δί’ χ̌έρι͜α να πορπατούν
σα στράτας στέρι͜α-στέρι͜α
Ους να πετούν σον ουρανόν
κι ευρίουνταν σ’ αστέρι͜α

Ταζέσσα πάντα πρέπ’ να έν’
να αποπαλαιούται
Κι ας σην κερήθραν ατ’ς το μέλ’
να τρέχ̌’ να μη τσουρούται

Να δί’ χ̌έρι͜α να πορπατούν
σα στράτας στέρι͜α-στέρι͜α
Ους να πετούν σον ουρανόν
κι ευρίουνταν σ’ αστέρι͜α

Γλωσσάρι

Κείμενο	Επεξήγηση	Ετυμ. Ρίζα
αποπαλαιούται	ξεπαλιώνει, ανανεώνεται
ατ’ς	αυτής, της
δί’	δίνει
δι͜αβαίν’	(για τόπο) περνάει/ώ, διασχίζει/ω, (για χρόνο) περνάει/ώ	διαβαίνω
εγάπ’	αγάπη
εγκάλιας	αγκαλιές
έμορφον	όμορφο
έν’	είναι
ευρίουνταν	βρίσκονται
ευτάει	κάνει, φτιάχνει	εὐθειάζω
καϊμλιαεύ’	δυναμώνει, ισχυροποιείται	kaim/ḳāʾim
’κι	δεν	οὐκί<οὐχί
μέλ’	μέλι
μονάζ’νε	φιλοξενούν για διανυκτέρευση
ομμάτι͜α	μάτια
ους	ως, μέχρι
πορπατούν	περπατούν
στέρι͜α	ακλόνητα, σταθερά, σιγά, αργά και καθαρά
στέρι͜α-στέρι͜α	σταθερά, σιγά-σιγά
στράτας	(ονομ.) δρόμοι, (αιτ.) δρόμους
ταζέσσα	φρέσκια, ζεστή	taze/tāze
τέρτι͜α	καημοί, βάσανα, στενοχώριες	dert
τρέχ̌’	τρέχει
τσουρούται	στεγνώνει, στραγγίζεται	σειρώ=εκκενώνω, αδειάζω
φωτάζ’νε	φωτίζουν, λάμπουν
χ̌αίρουνταν	χαίρονται