Πατρίδας φορεσία

Προβολή Τραγουδιού

Καλλιτέχνες: Μπάμπης Ιορδανίδης, Τάσος Παυλίδης

Έκιτι παλαιά καιρούς
και -ν- έκιτι βακίτι͜α
Όλια σεμνά και -ν- έμορφα
εθάρρ’νες είναι κίτι͜α

Εφέκανε τα παλαιά
ντο έσαν προκομμένα
Νέα μόδας εξέβανε
και τσ̌ιπ αφορισμένα

Ατώρα -ν- όλ’ φορούν κοντά,
όλια -ν- εφανερώθαν
Ας σο ’κι ’ξέρ’νε ντό να ευτάν’,
ας σο ντ’ επαλαλώθαν

Τεά φορούνε έμορφα
απ’ άνθεν κι από κάθεν
Και λέν’ «η μόδα αΐκον έν’»
η εντροπήν εχάθεν

Έκιτι σπαρέλ’ και φοτά
πατρίδας φορεσίαν
Η ζιπούνα μεταξωτόν
είχ̌εν πολλά αξίαν

Γλωσσάρι

Κείμενο	Επεξήγηση	Ετυμ. Ρίζα
αΐκον	τέτοιο/α
άνθεν	επάνω, από πάνω
ατώρα	τώρα
βακίτι͜α	χρόνια, εποχές, καιροί	vakit/vaḳt
έκιτι	έκφραση αναπόλησης που υποδηλώνει νοσταλγία για κάτι παρελθοντικό	hey gidi
έμορφα	όμορφα
έν’	είναι
εντροπήν	ντροπή
εξέβανε	βγήκαν
επαλαλώθαν	τρελάθηκαν
έσαν	ήταν
ευτάν’	κάνουν, φτιάχνουν	εὐθειάζω
εφανερώθαν	φανερώθηκαν
εφέκανε	άφησαν
εχάθεν	χάθηκε
ζιπούνα	μακρύ μανικωτό φόρεμα χωρίς ραφή στους ώμους	ζιπούνι(ν)<zipon (βενετ.)
κάθεν	κάτω, κάθε
’κι	δεν	οὐκί<οὐχί
κίτι͜α	ελάχιστα, σπάνια	kıt/ḳaḥṭ
’ξέρ’νε	(εξέρ’νε) ξέρουν, γνωρίζουν
όλ’	όλοι/α
όλια	όλα
πολλά	(επίθ.) πολλά, (επίρρ.) πολύ
σπαρέλ’	μέρος γυναικείας ενδυμασίας αυτοτελές που χρησιμεύει ως κάλυμμα του στήθους	spalliera
τεά	τάχα, δήθεν, υποτίθεται	deyü (οθωμ. περιόδου)
τσ̌ιπ	εντελώς, ολότελα, ακριβώς
φοτά	μέρος γυναικείας ενδυμασίας που έμπαινε πάνω από το λαχόρι, το ζωνάρι το οποίο έδεναν οι γυναίκες τριγωνικά στη μέση τους πάνω από τη ζιπούνα, γεν. ποδιά	futa